Ուկրաինայի նախագահ Վիկտոր Յանուկովիչի և երկրի ներքին գործերի նախարարության ինտերնետային կայքերն այսօր դադարել են գործել, քանի որ համացանցի դժգոհ օգտատերերը հարձակում են սկսել կայքերի վրա այն բանից հետո, երբ կառավարությունը որոշում է կայացրել փակել անօրինական բովանդակություն պարունակող կայքերը:
Reuters-ը հաղորդում է, որ ուկրաինական ոստիկանությունը երեքշաբթի օրը փակել էր Ex.ua-ն, որը միլիոնավոր ուկրաինացիներ օգտագործում են երաժշտություն, ֆիլմեր և համակարգչային ծրագրեր անվճար ձեռք բերելու համար: Իշխանությունը կայքին մեղադրել էր անօրինական բովանդակություն պարունակելու մեջ:
Այս քայլն առաջացրել էր ուկրաինացիների բարկությունը, ովքեր հարձակում էին սկսել կառավարական կայքերի վրա` ավտոմատ հարցումներ ուղարկելով, որոնց պատճառով կայքերը ծանրաբեռնվել էին և դադարել էին գործել:
Նախագահի խոսնակ Դարկա Չեպակն ասել է, որ անհայտ մարդիկ անցած գիշերվանից սկսած՝ հարձակումներ են գործել երկրի նախագահի պաշտոնական կայքի վրա:
