«Հրապարակ»-ը զրուցել է «Օրինաց երկիր» կուսակցության նախագահ Արթուր Բաղդասարյանի հետ:
– Հայտնի է, որ երեկ կայացել է կոալիցիայի վճռորոշ նիստը, որի ժամանակ, ըստ նախնական տեղեկությունների, ընտրությունների հետ կապված պայմանավորվածություններ են ձեռք բերվել: Պարոն Բաղդասարյան, ի՞նչ եք քննարկել երեկվա նիստի ժամանակ, ի՞նչ պայմանավորվածություններ են ձեռք բերվել, և այդ նիստն այսօրվա մեր քաղաքական գործընթացների վրա ի՞նչ ազդեցություն կունենա:
– Կարծում եմ՝ հասարակությունը սպասում էր կոալիցիոն գործընկերների այս հանդիպմանը, որովհետև մամուլում հնչեցվում էին բազմաթիվ հարցեր, որոնց պետք էր նաև պատասխան տրվեր: Կար անհրաժեշտություն՝ հստակություն մտցնել կոալիցիոն կուսակցությունների միջև առաջիկա ընտրությունների մարտավարության հետ կապված: Նիստն անցել է բավականին կառուցողական մթնոլորտում, քննարկվել են առաջիկա խորհրդարանական ընտրություններին նախապատրաստմանն առնչվող հարցեր, սկզբունքային համաձայնություն է ձեռք բերվել, որ ընտրություններն անցնեն ազատ և թափանցիկ, կոալիցիոն կուսակցություններն ընտրություններին կմասնակցեն առանձին-առանձին՝ սեփական ցուցակներով:
– Սա վերջնակա՞ն որոշում է, և այլևս փոփոխության ենթակա չէ՞:
-Հուսով եմ՝ այո, սակայն ես չեմ կարող բոլորի փոխարեն միարժեք պատասխանել, ես ուզում եմ ասել այն, ինչ երեկ որոշվել է: Լավ որոշում է կայացվել մեծամասնական ընտրակարգով պատգամավորության թեկնածուների առաջադրման հետ կապված, որ հնարավորինս լայն համաձայնության գան կոալիցիոն երեք կուսակցությունները, որպեսզի քաղաքական հանդուրժողականության մթնոլորտ լինի նախընտրական գործընթացում: Այսինքն՝ համագործակցության ոգի լինի, որովհետև կոալիցիոն ուժեր են, և երեք կուսակցություններն էլ համաձայնել են այս մոտեցմանը:
-Այսինքն` մեծամասնականից հրաժարվելու ընդդիմադիր կուսակցությունների առաջարկը, որին միացել է նաև ԲՀԿ-ն, կարելի է ասել, որ մերժվում է, և այդ թեման այլևս չի՞ քննարկվի:
-Դե, այդ թեման արդեն քննարկվել Է, Ընտրական օրենսգիրքն ընդունվել է, թեման կարող է քննարկվել…
-Ընդամենը մեկ շաբաթ առաջ են մեծ խումբ կուսակցություններ նման առաջարկով հանդես եկել:
-Իրենք առաջարկել են կազմակերպել խորհրդարանական լսումներ, իսկ լսումներ միշտ էլ կարելի է կազմակերպել, լսումներով չեն որոշումներ կայացնում: Յուրաքանչյուր քաղաքական կուսակցություն էլ կողմնակից է ավելի մեծ թվով համամասնական ընտրակարգին: Բայց մենք պետք է հաշվի առնենք երկու հանգամանք. առաջին` մենք արդեն ունենք ընդունված, քվեարկված, փոփոխված Ընտրական օրենսգիրք, որով սահմանվում են 41 մեծամասնական ընտրատարածքները:
Արդեն ձևավորված են հանձնաժողովները, և ներկայումս փոփոխություն անելը զուտ ժամանակային առումով խնդրահարույց է լինելու: Իհարկե, գերջանքերի շնորհիվ հնարավոր է այնուամենայնիվ փոփոխություններ անել, բայց հիմա հարց է առաջանում՝ եթե ամբողջությամբ համամասնական ընտրակարգին անցում կատարենք, ինչպե՞ս պետք է ձևավորվեն այդ հանձնաժողովները, ի՞նչ ժամանակահատվածում: Այսինքն, պետք է ընդունել իրողությունը, որ ժամանակ չկա: Ես հիմա չգիտեմ՝ Աժ-ն նիստ կգումարի՞, թե՞ ոչ, կարո՞ղ է նման որոշում կայացնել, թե՞ ոչ:
Պատգամավորները հիմա զբաղված են ընտրական խնդիրներով: Եվ ամեն խորհրդարանի վերջում այդպես էլ լինում է: Ինքս ժամանակին քանիցս հանդես եմ եկել առաջարկությամբ, որ ԸՕ-ի քննարկման շրջափուլում պետք է այդ բոլոր խնդիրները բարձրացնել: Հիմա կա միջազգային եզրակացություն ԸՕ-ի վերաբերյալ, ձևավորված են հանձնաժողովները, այդ մարդիկ քննություններ են հանձնել, նշանակվել են: Այսինքն, սրանք խնդիրներ են, որոնք, չեմ կարծում, որ երկու ամսում հնարավոր կլինի փոխել:
