WikiLeaks ինտերնետ-ռեսուրսի հիմնադիր Ջուլիան Ասանժի դեմ դատական հայց են ներկայացրել նրա նախկին փաստաբանները՝ իրենց հոնորարները չվճարելու մեղադրանքով:
«Մենք Ջուլիան Ասանժի հետ բազմակողմանի և երկարատև բանակցություններ ենք վարել հոնորարները վճարելու և դատական ծախսերի վերաբերյալ: Ասանժը փոխել է բնակության վայրը և այդ մասին տեղյակ չի պահել փաստաբաններին, ուստի մենք այլ տարբերակ չենք տեսնում, քան դատարան դիմելը»,- ասվում է իրավաբանական ընկերության հայտարարության մեջ:
Մեծ Բրիտանիայի Գերագույն դատարանում այսօր սկսվում են Ասանժի երկօրյա դատական լսումները՝ կապված Շվերդիային արտահանձնելու վճիռը բողոքարկելու հետ: Շվեդիայում Ասանժը մեղադրվում է երկու կանանց նկատմամբ սեռական ոտնձգություններ կատարելու մեջ, սակայն նա չի ընդունում իր նկատմամբ հարուցված մեղադրանքները՝ հայտարարելով, որ դրանք քաղաքական ենթատեքստ ունեն: Ասանժը մտավախություն ունի, որ Շվեդիան իրեն անմիջապես կարտահանձնի ԱՄՆ-ին, որտեղ նրան, հնարավոր է, մահապատժի ենթարկեն:
Ջուլիան Ասանժը համաշխարհային ճանաչում ձեռք բերեց այն բանից հետո, երբ WikiLeaks կայքում հրապարակեց Ամերիկյան դիվանագիտության գաղտնի նամակագրությունը:
