Թեև «Սուրբ Գրիգոր Լուսավորիչ» բժշկական կենտրոնի տնօրեն Արա Մինասյանը (Սերժ Սարգսյանի խնամին) մի քանի օր առաջ «ՀԺ»-ի թղթակցի հետ զրույցում հերքել էր լուրը, թե կենտրոնի աշխատակիցներին պարտադրաբար ՀՀԿ-ացնում են, սակայն բուժանձնակազմը շարունակում է բողոքել:
Երեկ «ՀԺ» խմբագրություն դիմած աշխատակիցներից մեկը կրկին վստահեցրել է, որ տնօրինությունը պարտադրում է իրենց ՀՀԿ ընդունվելու դիմում գրել: Նման դիմում է գրել արդեն 750 աշխատակից:
«Բուժաշխատողը նաև մի զավեշտալի պատմություն պատմեց: Բանն այն է, որ դիմումների հետ միասին տնօրինությունը աշխատակիցներից լուսանկար էր պահանջել, և այդ հարցը արագ լուծելու համար էլ լուսանկարիչ էր հրավիրել բժշկական կենտրոն, որը հենց աշխատավայրում լուսանկարել էր 750 բուժաշխատողի: Մի քանի օր անց լուսանկարները պատրաստ են եղել, բայց 750-ն էլ նետվել են աղբարկղ: Պարզվել է՝ այնքան են շտապել «ՀՀԿ-անալ», որ ոչ ոք չի նկատել, որ բոլոր աշխատակիցները լուսանկարվել են բժշկական սպիտակ խալաթներով:
Դրանից հետո հիվանդանոցի տնօրինությունը կարգադրել է, որ ամեն աշխատակից իր միջոցներով լուսանկարվի: Ասում են՝ մինչ օրս լուսանկար է ներկայացրել ընդամենը մի քանի հոգի»,- հավելում է թերթը: