Տասնյակ մարդիկ են վիրավորվել երեքշաբթի լույս չորքեշաբթի գիշերը Կահիրեում քաղաքական տարբեր կուսակցությունների կողմնակիցների միջև տեղի ունեցած ընդհարման արդյունքում: Այս մասին հայտնում է «Ազատություն» ռադիոկայանի ռուսական ծառայությունը:
Աշխարհիկ կուսակցությունների կողմնակիցները, որոնք հանդես են գալիս իշխանությունը Բարձրագույն զինվորական խորհրդից քաղաքացիական կառավարությանը անհապաղ հանձնելու պահանջով, փորձել են ներխուժել խորհրդարանի շենք: Նրանց ճանապարհը փակել են «Մուսուլման եղբայրներ» շարժման կողմնակիցները:
Ինչպես հայտնում է vesti.ru-ն, արդյունքում միջամտել են անվտանգության ծառայության աշխատակիցները: Տուժել է առնվազն 120 մարդ: Հասարակական կարգը կարողացել են վերականգնել միայն մի քանի ժամ անց, տասնյակ ակտիվիստներ ձերբակալվել են:
Ձախ և լիբերալ կուսակցությունների կողմնակիցները «Մուսուլման եղբայներին» մեղադրում են զինվորականների հետ պայմանավորվածություն ունենալու և անցած տարվա ապստամբության իդեալներին դավաճանելու մեջ:
Խորհրդարանի շենքի մոտ նրանք հանդիպել են «Մուսուլման եղբայրների» դիմադրությանը, որոնք կենդանի պատնեշ էին կազմել ցուցարարների դեմ: Նրանց վրա են նետել քարեր, ջրով շշեր, փայտեր, այնուհետև ծեծկռտուք է սկսվել:
