«Երեկ լրագրողական դաշտում և Աժ-ում ամենաքննարկվող թեմաներից մեկը Աժ հասարակայնության հետ կապերի վարչության արդեն նախկին պետ Գոհար Պողոսյանն էր, ում Աժ նախագահ Սամվել Նիկոյանն անօրինական կերպով ազատել է աշխատանքից»,- գրում է «Երկիր»-ը և հավելում.
«Մեր տեղեկություններով` Նիկոյանը Պողոսյանի վրա վաղուց «ատամ ուներ» և սպասում էր հարմար առիթի: Աժ-ում խոսակցություններ կան, որ սա անգամ Նիկոյանի անձնական որոշումը չէ, Նիկոյանին այս քայլին դրդել են հենց իր մերձավորները, ովքեր, ի դեպ, մտերմացել են Նիկոյանի հետ միայն նրա պաշտոն ստանալուց հետո: Ասում են` Աժ-ում կան մարդիկ, ում Նիկոյանը կուրորեն լսում է, նրանք էլ օգտագործում են ընձեռված հնարավորությունը «սրա-նրա տակ փորելու համար»:
Թերթի աղբյուրների համաձայն` Նիկոյանը վտանգ էր տեսնում 20 տարի Աժ-ում աշխատած և այդ տարիների ընթացքում մեծ կապեր ձեռք բերած վարչության պետից, բայց «հարմար առիթն» այդպես էլ չկարողացավ գտնել: ԱԺ-ում անգամ շշուկներ կան, որ Նիկոյանն ասել է, թե տեսնեմ այդ ինչպես է դատարան դիմելու:
«Նիկոյանը մեծ հույս ունի, որ իր կողմնակիցների միջոցով կկարողանա ազդել դատական քննության վրա: Թե ում կնշանակի Պողոսյանի փոխարեն, դեռ հայտնի չէ. հիշեցնենք, որ վերջերս Նիկոյանը Պողոսյանի տեղակալին տարավ իրեն օգնական:
Մի ուշագրավ փաստ ևս՝ մինչև Գոհար Պողոսյանին աշխատանքից ազատելը, Սամվել Նիկոյանի ֆեյսբուքյան էջի հավանողների թիվը 560-ն էր, իսկ երեկ դարձել էր 340»,- հավելում է թերթը:
