Նախորդ երկու տարիներին «Եվրատեսիլ» միջազգային մրցույթում հայկական շոուն, մեծ հաշվով, ոչ վատ էր ստացվում, ոչ էլ լավ, և «Եվրատեսիլին» մասնակցելու պայքարը ավելի համառ և երբեմն էլ կրքոտ բնույթ էր կրում: Երգիչ-երգչուհիների մեջ եվրատեսիլյան բեմում հայտնվելը մեծ բեմեր նվաճելու ցանկություն է առաջացնում (իհարկե, կան նաև այնպիսիներ, որոնք կարծում են՝ կմասնակցեն «Եվրատեսիլին» այն ժամանակ, երբ մեր երկիրը պատրաստ կլինի հաղթանակի): Այն, որ մրցույթն իր հիմքում քաղաքականություն ունի` կասկածի տակ չեն դնում անգամ «Եվրատեսիլի» հայաստանյան պատվիրակության անդամները:
Ինչևէ, «Եվրատեսիլ-2011»-ի Հայաստանը ներկայացնող երգչուհի Էմմին իր Boom-boom երգով, մեծ հաշվով, բում չկարողացավ անել և եվրոպացիների սիրտը այնքան էլ չշահեց, ընդամենը 33 միավոր վաստակեց, ինչի արդյունքում այդ օրվա 19 ելույթների մեջ Հայաստանի ներկայացուցիչը հայտնվեց 15-րդ տեղում:
2012-ին, սակայն, իրավիճակն այլ է, մինչև վերջերս պարզ էլ չէ՝ Հայաստանը կմասնակցի՞ Բաքվում «Եվարտեսիլ-2012»-ին, թե՞ ոչ: Օրերս Հանրային հեռուստաընկերությունը, հաշվի առնելով «Եվրատեսիլ-2012»-ի առանձնահատկությունը, որոշել է մայիսին Բաքվում կայանալիք մրցույթի Հայաստանի մասնակցի և երգի ընտրության մրցույթն անցկացնել ներքին ընտրությամբ:
Եվրատեսիլյան կրքերն աստիճանաբար թեժանում են: Այս անգամ ոչ միայն ներքին ընտրությունն է նորություն, այլև արդեն կարծես թե սկսում են նախկին մասնակիցների անուններն էլ շահարկվել: Օրինակ՝ կարծիք կա, որ ամենայն հավանականությամբ այս տարի Բաքվում Հայաստանը դարձյալ կներկայացնի Եվա Ռիվասը, Ռազմիկ Ամյանը (վերջինիս պրոդյուսերը հերքեց այդ լուրը), «Դորիանս» ռոք խումբը հավակնություն ունի մասնակցելու, սակայն չգիտի՝ որտեղ ներկայացնի իր երգը: Շոու-բիզնեսի շատ ներկայացուցիչների համակրանքը, սակայն, «Դորիանսի» կողմն է: Սակայն ամենահավանական թեկնածուն շարունակում է մնալ ամերիկահայ երգչուհի Լուսիա Մունը:
«Եվրատեսիլի» հայաստանյան պատվիրակության ղեկավար Գոհար Գասպարյանը մեզ հետ զրույցում նշեց, որ մինչև մարտի 18-ը և գուցե ավելի շուտ պարզ կլինի՝ ով կներկայացնի Հայաստանը «Եվրատեսիլ-2012»-ում, և այդ մասին առաջիկայում մանրամասն կտեղեկացնի խորհրդի նախագահ Ալեքսան Հարությունյանը: Անդրադառնալով «ներքին ընտրություն» տարօրինակ ձևակերպմանը, և թե ինչ է փոխվել նախկին տարիների համեմատ, և թե արդյոք Բաքո՞ւն է պատճառը ներքին ընտրություն ձևակերպմանը, Գոհար Գասպարյանը ասաց, որ առաջին տարին, երբ Անդրեն ընտրվեց իր երգով, դարձյալ ներքին ընտրություն էր կազմակերպվել: Նրա խոսքերով, «սա ժամանակի, ֆինանսների հարց է, պայմանավորված է նաև աշխարահագրական դիրքով, կան հարցեր, որոնք հեռուստաընկերությունը քննարկում է և որոշում կայացնում:
Հաշվի առնելով այս տարվա «Եվրատեսիլի» առանձնահատկությունը, Հանրային հեռուստաընկերությունը որոշում է կայացրել կազմակերպել ներքին ընտրություն»: Իսկ հարցին՝ Լուսիա Մունի կամ «Դորիանսի» մասնակցության մասին լուրեր են շրջանառվում, հավանակա՞ն է, որ նրանցից մեկն ընտրվի, Գոհար Գասպարյանը նշեց, որ բոլորի ցանկություններն են հաշվի առնվում, իսկ պրոֆեսիոնալ թիմը կորոշի միակ մասնակցին: Մրցույթին, Գ. Գասպարյանի խոսքերով, ավելի լավ պետք է պատրաստվել, հարցեր կան, որոնց շուրջ քննարկումները շարունակվում են:
«Դորիանս» խմբի պրոդյուսեր Վահագն Գևորգյանը նշեց, որ նախընտրական փուլ չի հայտարարվել, ուստի իրենք չգիտեն՝ որտեղ ներկայացնեն երգը, թեև նշեց, որ «Դորիանսը» պատրաստ է մասնակցել, ավելին՝ ունի «Եվրատեսիլի» համար գրված երգ, իսկ իրենց մասնակցելու առաջարկ մինչև այսօր չի արվել:
Երգիչ Հայկոն, որը 2007-ին «Եվրատեսիլում» ներկայացրեց Հայաստանը, մեզ հետ զրույցում ցանկություն հայտնեց, որ «Դորիանս» խումբը ներկայացնի Հայաստանը. «Ես նրանց երկրպագուներից եմ, և դա շատ ճիշտ ընտրություն կլինի, որովհետև արժանի են»,- ասաց երգիչը՝ հավելելով, որ ֆավորիտների ցուցակում «Դորինասի», Անդրեի, Սիրուշոյի անուններն են, իսկ քանի որ վերջին երկուսը եղել են արդեն, ուստի «Դորիանսի» թեկնածությունը հնարավոր է:
Ռազմիկ Ամյանի պրոդյուսեր Արմեն Մովսիսյանը ժխտեց Ռազմիկ Ամյանի հնարավոր մասնակցության մասին լուրը՝ հիշեցնելով, որ իրենք դեռ 2010-ին հայտարարեցին, որ այլևս չեն մասնակցելու: Հարցին՝ իսկ եթե համոզի Հանրային հեռուստատեսությունը, ինչպես համոզեց Էմմիին նախորդ տարի, պրոդյուսերն ասաց՝ հո մենք աղջիկ չենք, որ համոզեն, համերգներով ենք խառը, անհնար է և բացառված, թեև նկատեց, որ «Եվատեսիլի» մրցույթը ամենահեղինակավոր մրցույթներից է, այն լուրջ մրցույթ է, որը երկրին ճանաչում է բերում:
Երգչուհի Հասմիկ Կարապետյանը նույնպես նախապատվությունը «Դորիանսին» է տալիս. «Կարծում եմ, որ «Դորիանսը» կարող է ապահովել որակ, այս դեպքում դա շատ ավելի կարևոր է, քան զբաղեցրած տեղը»:
Իսկ լոսանջելեսաբնակ Լուսիա Մունը արդեն ուղարկել է իր երգերից երկու տարբերակ, նրա հետ զրույցը կներկայացնենք առաջիկայում:
Ըստ շրջանառվող լուրերի՝ նրա երգը խորհրդից շատերն են հավանել: Սակայն ընտրությունը, ինչպես Հանրային հեռուստատեսության հաղորդագրության մեջ է նշված, կկատարի ՀՀ Հանրային հեռուստառադիոընկերության խորհրդի կողմից ձևավորված հատուկ հանձնախումբը, որտեղ կընդգրկվեն երաժիշտներ, հեռուստատեսության մասնագետներ և երաժշտական պրոդյուսերներ:
