Pepsi ընկերությունը Super Bowl-ի (ԱՄՆ Ազգային ֆուտբլային լիգայի սուպերգավաթ) ժամանակ ցուցադրված գովազդային հոլովակում դարձյալ ցույց է տվել, որ գնորդներն իր արտադրանքը գերադասում են Coca-Cola ընկերության արտադրանքից: Այս մասին հաղորդում է The Drum պորտալը:
Գովազգային հոլովակում բեռնատարի վարորդը Coke Zero-ի (Coca-Cola Light-ի ամերիկյան տարբերակը) ֆիրմային արտահագուստով փորձում է, Coca-Cola-ի արտադրանքի փոխարեն, գաղտնի գնել Pepsi MAX: Սակայն դա նկատում է գանձապահ աղջիկը, որն այնուհետև նրան առաջարկում է լրացնել Pepsi MAX-ի խմիչքների զեղչի քարտը: Արդյունքում վարորդը շահում է վիճակախաղը և իր վրա է հրավիրում ամբողջ խանութի ուշադրությունը: Իսկ մրցանակն է՝ ամբողջ կյանքի ընթացքում Pepsi MAX-ից անվճար օգտվելու կտրոն, որը նրան շնորհում է «Ո՞վ է ուզում դառնալ միլիոնատեր» ամերիկյան շոուի վարող Ռիջիս Ֆիլբինը:
PopSop պորտալը գրում է, որ այս շաբաթ Pepsi-ն կներկայացնի ևս մեկ գովազդային հոլովակ: «Թագավորական պալատ» անվամբ հոլովակում նկարահանվել է բրիտանացի երգիչ Էլթոն Ջոնը և X-Factor 2011 հեռուստատեսային շոուի հաղթող Մելանի Ամարոն: Առայժմ YouTube-ում տեղադրված է միայն հոլովակի նկարահանումների տեսանյութը:
Pepsi ընկերությունն առաջին անգամ չէ, որ իր գովազդային հոլովակում ծաղրում է մրցակցին: Այսպես, 2011 թ. ամռանը նա ներկայացրեց մի գովազդային հոլովակ, որում Սանտա Կլաուսը բարում Pepsi է խնդրում՝ բացատրելով, որ ինքն այժմ արձակուրդի մեջ է: