Ինչպես հայտնի է, նախօրեին նախագահական նստավայրում տեղի է ունեցել իշխող կոալիցիայի խորհրդի նիստ: Նիստի ընթացքում կարծես թե ճակատագրական որոշումներ չեն կայացվել, համենայնդեպս` դրանց մասին առայժմ տեղեկություններ չկան: Սակայն նիստի հանգամանքը հետաքրքրական է դառնում մեկ այլ իրողության հետ համադրելիս, կամ, ավելի շուտ, հենց այդ իրողությունն է առավել հետաքրքրական դառնում, երբ համադրում ենք կոալիցիոն նիստի հետ:
Խոսքը Վարդան Օսկանյանի հայտնի հայտարարության մասին է, ըստ որի՝ նա գրեթե ընդունում է, որ կներգրավվի ԲՀԿ համամասնական ցուցակում: Վարդան Օսկանյանի այս խոստովանությունը հնչում է կոալիցիայի նիստի նախաշեմին: Իսկ նիստը հազիվ թե հրավիրված լիներ հապշտապ: Այսինքն՝ նիստի մասին պայմանավորվածությունը երևի թե եղել է ավելի վաղ, համենայնդեպս՝ Օսկանյանի հայտարարությունից էլ ավելի վաղ: Հետևաբար Վարդան Օսկանյանի հայտարարությունը, ինչը գրեթե հավասարազոր է Ռոբերտ Քոչարյանի հայտարարության, փաստորեն նախորդել է կոալիցիայի պայմանավորված նիստին: Այլ կերպ ասած՝ «Բարգավաճ Հայաստան» կուսակցության առաջնորդ Գագիկ Ծառուկյանը նիստին գնացել է Վարդան Օսկանյանի, նույնն է թե՝ Ռոբերտ Քոչարյանի հայտարարությամբ զինված:
Ըստ ամենայնի, Ծառուկյանը բավական դժվար իրավիճակում է եղել նիստից առաջ և բավական բարդ սպասումներ է ունեցել, ինչին էլ փորձել է դիմագրավել Ռոբերտ Քոչարյանի օգնությամբ՝ ի դեմս Վարդան Օսկանյանի հայտարարության: Այլ կերպ ասած՝ Վարդան Օսկանյանի հայտարարությունը կոալիցիայի նիստից մի քանի ժամ առաջ, ըստ երևույթին, նպատակ ուներ օգնել այդ նիստին գնացող Գագիկ Ծառուկյանին, որը երևի թե պետք է ինչ-որ պատասխան տար Սերժ Սարգսյանին:
Ըստ երևույթին հայտարարության նպատակը Սերժ Սարգսյանին հասկացնելն էր, որ եթե Ծառուկյանին ներկայացվեն անընդունելի կամ անվերապահ պահանջներ, ապա Ռոբերտ Քոչարյանն ակտիվորեն կմտնի խաղի մեջ և կփորձի աջակցել Ծառուկյանին՝ անգամ չերկմտելով ընդդիմության հետ համագործակցության մասով:
Ավելին, Վարդան Օսկանյանն իր հայտարարության մեջ խոսում է քաղաքական դաշտի լայն կոնսոլիդացիայի մասին՝ ընդդեմ «անարդար ընտրությունների», ինչը ևս Քոչարյանի կողմից ակնարկ է Սերժ Սարգսյանին, որ ԲՀԿ-ին ճնշելու դեպքում ինքը քաղաքական դաշտը կփորձի մոբիլիզացնել Սերժ Սարգսյանի դեմ:
Իհարկե, այդ հարցում Քոչարյանի հնարավորությունները ներկայումս, մեղմ ասած, հարաբերական են, սակայն տվյալ պարագայում կարելի է գուցե արձանագրել, որ այս պահի դրությամբ այն երևի թե կատարել է իր դերը՝ նկատի ունենալով, որ կոալիցիոն երեկվա նիստում ճակատագրական հանգուցալուծումներ ԲՀԿ-ի համար առայժմ չեն եղել:
