«Երեկ տեղի է ունեցել կոալիցիայի հերթական հանդիպումը: Մեր աղբյուրները պնդում են, որ ՕԵԿ-ի` հինգշաբթիից շաբաթ օր տեղափոխված քաղխորհրդի նիստը կրկին հետաձգվել է հենց այս հանդիպման պատճառով»,- գրում է «Երկիր»-ը և հավելում.
«Հիշեցնենք, որ անցած հանդիպման ժամանակ պայմանավորվածություն ձեռք չէր բերվել ինչպես ՕԵԿ-ի, այնպես էլ ԲՀԿ-ի մասով: Կոալիցիայի առաջին հանդիպումը գրեթե ձևական և ուսուցողական բնույթ է կրել. սեղանին պահանջ չի դրվել, ընդունող կամ մերժող էլ չի եղել….
Երեկվա հանդիպման ժամանակ կողմերը կարծես որոշակի համաձայնության են եկել, բայց ոչ վերջնական: Նշենք, որ մեր մեկ այլ աղբյուրի փոխանցմամբ` նման հանդիպումներում կոալիցիայի առաջնային քննարկելիք խնդիրներից են նաև մեծամասնական տեղերը իրար մեջ բաժանելու հարցը: Հանրապետականը փորձում է պայմանավորվածություններն այնպես ձեռք բերել և այնպես անել, որ այս ընտրակարգով առաջադրումները վերահսկողությունից դուրս չգան:
Շատ հնարավոր է, որ այս շաբաթվա մեջ սա կոալիցիայի միակ հանդիպումը չլինի. մյուս հանդիպման ժամանակ արդյունքն ավելի տեսանելի է լինելու, հավանական է, որ այն լինի ՀՀԿ գործադիր մարմնի նիստից հետո»:
