ԱՊՊԱ համակարգի ներդրումից հետո անցած մեկ տարվա ընթացքում պարզ դարձավ, որ պայմանագրերի սակագները շատ ավելի բարձր են, քան ընկերությունները ծախսում են փոխհատուցումների համար. հավաքագրված և վճարված գումարների տարբերությունը շուրջ 8 մլրդ դրամ է:
ԱՊՊԱ պայմանագրերի սակագները վերանայելու և ոլորտի շահույթը նվազեցնելու փոխարեն, Հայաստանի ավտոապահովագրողների բյուրոն որոշել է, որ առավել նպատակահարմար է, որպեսզի փոփոխվեն ապահովագրական գումարների առավելագույն սահմանաչափերը:
«Առաջին լրատվական»-ի հարցադրմանը՝ չի՞ նախատեսվում արդյոք վերանայել սակագները, բյուրոյից պատասխանեցին, որ 2012 թ. ավելացել են հատուցման ենթակա առավելագույն չափերը թե՛ անձնական և թե՛ գույքային վնասների դեպքում. անձնական վնասների համար ապահովագրական գումարն ավելացվել է 300 հազար դրամի չափով` ըստ յուրաքանչյուր տուժողի` կազմելով 3.3 միլիոն դրամ, նախկին` 3 մլն-ի փոխարեն, և 1 միլիոն դրամի չափով՝ ըստ յուրաքանչյուր ապահովագրական պատահարի` կազմելով 10 միլիոն դրամ, նախկին` 9 միլիոնի փոխարեն:
Գույքին պատճառված վնասների համար ապահովագրական գումարն ավելացվել է 300 հազար դրամի չափով՝ ըստ յուրաքանչյուր ապահովագրական պատահարի` կազմելով 1.8 միլիոն դրամ` նախկին 1.5 միլիոնի փոխարեն:
«Հատուցման առավելագույն չափի մեծացումը սպառողների շահերի պաշտպանության տեսանկյունից ամենաարդյունավետ մոտեցումն է: Կատարված փոփոխությունը կնպաստի, որպեսզի ավտովթարի արդյունքում տուժողին պատճառված վնասը հնարավորինս շատ դեպքերում ամբողջությամբ հատուցվի ԱՊՊԱ համակարգի շրջանակներում, և մեղավոր վարորդն ազատված լինի անձամբ որոշակի ծախսեր կատարելուց, իսկ տուժողը` լրացուցիչ քաշքշուկներից»,- նշել են բյուրոյից:
2013 թ. արդեն գործելու է Բոնուս-Մալուս համակարգը և այդ ժամանակվանից ԱՊՊԱ ապահովագրավճարի չափը կախված է լինելու անձի 2011 և 2012 թվականների վարորդական պատմությունից: Բոնուս-Մալուս համակարգի շնորհիվ կարգապահ վարորդները, ում մեղավորությամբ ավտովթար տեղի չի ունեցել, կվճարեն անհամեմատ ցածր ապահովագրավճարներ, քան այն վարորդները, ում մեղավորությամբ տեղի են ունեցել շատ ավտովթարներ:
Բյուրոյից նաև տեղեկացրել են, որ 2012 թ. ապրիլի 1-ից ԱՊՊԱ վկայագրերի լրացման գործընթացը կկատարվի էլեկտրոնային տարբերակով, ինչը կնպաստի ԱՊՊԱ պայմանագրերի ընթեռնելիությանը, ինչպես նաև արագ մուտք կատարելուն տեղեկատվական համակարգ, ինչն էլ իր հերթին կկանխի հատուցումների գործընթացում ուշացումները, որոնք կարող էին տեղի ունենալ տեղեկատվական համակարգ տվյալների ուշ մուտք գործելու պատճառով:
