Այսօր լրագրողների հետ հանդիպման ժամանակ Հայկական ճարտարապետությունն ուսումնասիրող ընկերության նախագահ Սամվել Կարապետյանը խոսեց Սբ. Նշան եկեղեցու ազգային պատկանելիության խնդրի շուրջ, քանի որ վրաց պատրիարքարանի կողմից կասկածներ էին հնչել դրա վերաբերյալ:
Նա ներկայացրեց երեք փաստարկներ, համաձայն որոնց՝ եկեղեցին հայկական է: Բանախոսը տեղեկացրեց, որ դեռևս 1837թ. վրացի հետազոտող Պ. Իոսելիանին կարծիք էր հայտնել, թե 1703թ. հայերը հիմնել էին Սբ. Նշան եկեղեցին դրանից առաջ գոյություն ունեցած վրաց ուղղափառ եկեղեցու տեղում:
Ըստ Ս. Կարապետյանի`այս հայտարարության վրա հիմնվել են բազմաթիվ հետազոտողներ: Բանախոսը ճիշտ է համարում Իոսելիանիի այն վկայությունը, թե ներկա կառույցի տեղում ավելի հին եկեղեցի է եղել, միայն թե, ինչպես փաստում են սկզբնաղբյուրները, այն նույնպես հայկական է եղել: Ընդ որում, նոր եկեղեցուն է փոխանցվել հին եկեղեցու` Սբ. Նշան Սբ. Նիկողայոսի անվանումը:
Հուշարձանագետի խոսքով` ներկայիս եկեղեցու տեղում հայկական հին եկեղեցու գոյության ապացույցները երեքն են: «Առաջինն այն խորհրդատետրն է, որի հիշատակարանում մատնանշված գրչության վայրը անորոշ է համարվել, այդ իսկ պատճառով քննությունից դուրս է մնացել: Կեսարացի Անդրի քահանան 1624թ. ձեռագիրը փոխանցել է Տփղիսի Սբ. Նիկողայոս եկեղեցուն: Հետևաբար այդ թվականին քաղաքում գոյություն ունեցող հայոց եկեղեցիների թվում կար նաև Սբ. Նիկողայոս անվամբ եկեղեցի:
Երկրորդ վկայությունը վերաբերում է 1656 թվականին գրիչ Աղամալ Ջուղայեցու ձեռքով Տփղիսի Մուղնու Սբ. Գևորգ եկեղեցում ստեղծված և Սբ. Նշան եկեղեցուն նվիրաբերված Գանձարանին, որի հիշատակարանում նշված է այդ մասին:
Եվ վերջապես 1672թ., ի թիվս քաղաքի հայկական 8 եկեղեցիների, Սբ. Նշանը հիշատակում է նաև Ֆրանսիայի հայտնի ճանապարհորդ Ժան Շարդենը»,- մանրամասնեց հուշարձանագետը`ապացուցված համարելով, որ եկեղեցին հայկական է:
Նա նաև փաստեց, որ շատ այլ հայկական եկեղեցիներ Վրաստանում ոչնչացվել են: Ս. Կարապետյանի կարծիքով`պետք է լինել ավելի հետևողական և ուշադիր հայկական ժառանգության նկատմամբ:
Ըստ Ս. Կարապետյանի՝ այս գործելակերպը նորություն չէ. նույն մարտավարությունը շարունակվում է կիրառվել մի քանի այլ եկեղեցիների նկատմամբ:
Հիշեցնենք, որ Սբ. Նշան Սբ. Նիկողայոսի եկեղեցին գտնվում է նախկին Հերակլի հրապարակից ոչ հեռու` Հ. Հակոբյան և Սերեբրյանայա փողոցների հատման մասում: Եկեղեցու հիմնադրման ստույգ ժամանակահատվածը հայտնի չէ: Հիմք ընդունելով հյուսիսային մուտքի ճակատին առկա 1720 թ. արձանագրությունը, որտեղ վկայություն կա եկեղեցու՝ դեռևս 1703 թ. հիմնադրված լինելու մասին, կառուցման խնդրին առնչված բոլոր նախկին ուսումնասիրողները Սբ. Նշան եկեղեցին համարել են 1703-1720թթ. կառույց: Ընդ որում, եկեղեցին անավարտ է: 60 տարի անց կառուցվել է գմբեթը:
