Վրացական «Ասավալ-դասավալի» թերթին տված հարցազրույցի ժամանակ Վրաստանի նախկին նախագահ Էդուարդ Շևարդնաձեն հայտարարել է, որ Վրաստանին անհրաժեշտ է նոր ղեկավար՝ Ռուսաստանի հետ պարտադիր երկխոսության վերականգնման համար.
«Վրաց ժողովրդին կոչ եմ անում վերլուծել Ռուսաստանի նախագահ Դմիտրի Մեդվեդևի և վարչապետ Վլադիմիր Պուտինի հայտարարությունները: Ճիշտ չէ, երբ վրացական ղեկավարությունը հայտարարում է, որ Վրաստանի հաջորդ իշխանությունները նույնպես երկխոսության մեջ չեն մտնի Ռուսաստանի հետ:
Դրա համար պետք է աջակցել ընդդիմադիր միլիարդատեր Բիձինա Իվանիշվիլիին, որի հաղթանակը հնարավորություն կընձեռի կարգավորել Ռուսաստանի հետ հարաբերությունները և բարելավել Արևմուտքի հետ հարաբերությունները: Բոլորն ականատես են եղել, որ ժամանակին ես հավասարակշիռ քաղաքականություն եմ վարել թե՛ ԱՄՆ-ի, թե՛ Ռուսաստանի հանդեպ:
Ներկայումս մենք գտնվում ենք փակուղում, և փոփոխությունները պարտադիր են՝ թեկուզև նրա համար, որ մենք ունենանք նոր ղեկավար, որի հետ կերկխոսի Ռուսաստանը: Այդ երկխոսությունը կորսված տարածքների վերադարձման գլխավոր գործոնն է»:
Հիշեցնենք, որ օրեր առաջ Պուտինն ու Մեդվեդևը հայտարարեցին, որ Ռուսաստանը պատրաստ է Վրաստանի հետ երկխոսությանը և նրա հետ հարաբերությունների կարգավորմանը, սակայն դրա միակ խոչընդոտը Վրաստանի նախագահ Միխեիլ Սաակաշվիլին է, որի հետ իրենք չեն երկխոսի:
Դրանից հետո Վրաստանի ԱԳՆ-ը հայտարարեց, որ խնդիրը Սաակաշվիլին չէ, և Վրաստանի հաջորդ իշխանությունները նույնպես չեն ենթարկվի Ռուսաստանին:
