«Բանակն իրականում» քաղաքացիական նախաձեռնության հիմնադիր անդամ Լալան կարծում է, որ բանակում վերջին տարիներին դրական տեղաշարժեր չեն եղել: Այս մասին նա ասաց «Առաջին լրատվական»-ի հետ զրույցում:
Ըստ Ասլիկյանի, ինքը բանակում խաղաղ պայմաններում տեղի ունեցող սպանությունների դեմ սկսել է պայքարել մեծ հնչեղություն ստացած Մատաղիսի դեպքից հետո: Համոզվելով, որ փորձ է արվում սպանության մեղքը գցել երեք անմեղ զինծառայողների վրա՝ մի քանի ակտիվիստներ, այդ թվում՝ Լալա Ասլիկյանը, փորձել են մեծ հնչեղություն տալ գործին: «Նույնիսկ սպանվածի ծնողներն այդ տղաների կողքին էին կանգնած և նրանց էին պաշտպանում: Վաղուց կար բողոք բանակում տեղի ունեցող դեպքերի վերաբերյալ»,- ասաց իրավապաշտպանը: Վերջինիս խոսքերով, բանակում տեղի ունեցող դեպքերի խնդրին առավել մեծ հնչեղություն հաղորդեց Facebook սոցիալական ցանցը:
«Ծնողներն արդեն մի քանի տարի շարունակ պայքարում են իրենց տղաների սպանության բացահայտման համար, դիմում-բողոքներ են ներկայացնում և մերժվում են: Զինդատախազն ասում է, թե դեպքերը կրճատվել են, բայց Հելսինկյան կազմակերպության տվյալներով, դեպքերը չեն կրճատվել: Զինդատախազին պետք է նաև հարցնել, թե ինչ հոդվածներով են նրանք շարունակում դատապարտվել»,- ասաց Լալա Ասլիկյանը:
Ըստ Ասլիկյանի, ինքը կցանկանար տեսնել բանակ, որտեղ հայ զինվորը պաշտպանված կլինի, որտեղ զինվորը կլինի զինվոր և ո՛չ թե ստրուկ, որտեղ գողական և բիզնեսային հարաբերությունները չեն լինի:
«Բանակն իրականում» քաղաքացիական նախաձեռնության հիմնադիր անդամի կարծիքով առաջին հերթին բանակը պետք է ապաքաղաքականացվի, պիտի սկսվեն քննարկումներ մասնագիտացած բանակ ունենալու վերաբերյալ: «Զինվոր-սպա հարաբերությունները պետք է կարգավորվեն ու լուրջ փոփոխությունների ենթարկվեն, ՊՆ ենթակայությունից պետք է դուրս գա քննչական ծառայությունը»,- ասաց իրավապաշտպանը: Ըստ նրա, այդ փոփոխությունները պետք է արվեն, որպեսզի բանակում վիճակը լավանա: Սակայն այս պահին, Ասլիկյանի գնահատմամբ, գումարները ծախսվում են շքեղ միջոցառումներ կազմակերպելու և ֆիլմեր նկարահանելու համար, որոնք կոնկրետ քայլեր չեն:
