Բանակը մեզանում գործող ամենաարդյունավետ օղակներից մեկը կարելի է համարել, քանի որ տարիներ շարունակ այն մեր երկրի ու մեր ֆիզիկական անվտանգությունն է ապահովում` կատարելով իր ֆունկցիան, չնայած թշնամու սադրանքներին ու այնտեղ տիրող իրավիճակին: Սակայն սա չի նշանակում, որ խնդիրներ չկան: Խոսելով բանակում տիրող իրավիճակի մասին` «Առաջին լրատվական»-ի հետ զրույցում ասաց հոգեբան Կարինե Նալչաջյանը:
Նրա խոսքով` բոլորս էլ լավ գիտենք, որ բանակում կան ներքին խնդիրներ, որոնք ժամանակ առ ժամանակ որպես ողբերգական իրադարձություններ կանգնում են մեր առջև:
«Իհարկե, այդ դեպքերն անթույլատրելի են ու դրանց հետևից պետք է գնալ ամենայն լրջությամբ: Անհրաժեշտ է բացահայտել ոչ միայն դեպքն ու պատժել մեղավորներին, այլև պետք է խորամուխ լինել այն պատճառների մեջ, որոնց արդյունքում այդ միջադեպը տեղի է ունեցել»,- ասաց հոգեբանը: Ըստ նրա՝ նմանատիպ դեպքեր լինում են ամբողջ աշխարհում, ու դրանք ներկայացնել որպես միայն մեր բանակին բոնորոշ բան՝ չի կարելի:
Ըստ Կ. Նալչաջյանի՝ իր ասածը բնավ չի նշանակում, թե մենք պետք է այդ դեպքերն արդարացնենք, սակայն պետք է հաշվի առնել այդ հանգամանքը: «Մենք պետք է օգնենք մեր բանակին, պետք է սիրենք այն: Եթե կան թերություններ ու ողբերգություններ, ապա պետք է սրտացավորեն վերաբերվել դրան: Դա չպիտի հիմք հանդիսանա Հայոց բանակը վարկաբեկելու համար: Վարկաբեկել բանակը, ներսից թուլացնել բանակը, բանակի նկատմամբ մեր դիրքորոշումները դարձնել տագնապահարույց՝ շատ նման է ինքնասպանության»,- ասաց հոգեբանը:
