Ադրբեջանական APA լրատվական գործակալության փոխանցմամբ՝ Կասպից ծովում նոր քաղաքի (Khazar Islands) շինարարությունն արժենալու է 100 միլիարդ դոլար: Այս մասին հայտնել է Avesta կոնցեռնի նախագահը:
Նրա խոսքերով՝ Khazar Islands-ը կառուցվելու է արհեստական արշիպելագի վրա և բաղկացած է լինելու տարբեր մեծության 41 կղզիներից, որոնց տարածությունը կազմելու է 3000 հեկտար, ինչը բաժանվելու է 19 միկրոշրջանի:
Ընդհանուր առմամբ, արշիպելագը զբաղեցնելու է 24 քառակուսի կիլոմետր տարածություն, արշիպելագի երկարությունը կազմելու է 8 կիլոմետր, իսկ լայնությունը՝ 3 կիլոմետր: Avesta կոնցեռնը դրա կառուցումը սկսել է 10 ամիս առաջ և ներկայումս աշխատանքներ է տանում 4 մեծ կղզիներից մեկի ստեղծման վրա:
Ընդհանուր առմամբ, քաղաքն ունենալու է 1 միլիոն բնակիչ: Այս նախագիծն իրականացվելու է փուլ առ փուլ և ավարտվելու է 2022-2023 թվականներին: Քաղաքում առաջին բնակիչները բնակեցվելու են 2013-2014 թվականներին:
Կառուցվելու են զբոսայգիներ, 150 դպրոցներ, 50 մանկապարտեզներ ու հիվանդանոցներ, օդանավակայան, համալսարաններ, հյուրանոցներ, բիզնես-կենտրոններ, առևտրային կենտրոններ, թատրոններ, ռեստորաններ, «Ֆորմուլա -1»-ի խճուղի, 1 կիլոմետր բարձրությամբ «Ադրբեջանի աշտարակը»: Նախագիծը գնահատվում է 100 միլիարդ դոլար:
Հիշեցնենք, որ «Ադրբեջանի աշտարակի» (Azerbaijan Tower) բարձրությունը կազմելու է 1050 մետր, ինչը նշանակում է, որ այն կլինի աշխարհի ամենաբարձր աշտարակը։ «Ադրբեջանի աշտարակն» ունենալու է 185 հարկ և 200 մետրով գերազանցելու է Դուբայում կառուցված Burj Khalifa աշտարակին, որը ներկայիս դրությամբ աշխարհի ամենաբարձր շինությունն է։ Բացի այդ, ադրբեջանական աշտարակը 50 մետրով կգերազանցի Kingdom Tower-ին, որը պլանավորված է կառուցել Ջիդդայում (Սաուդյան Արաբիա)։