Բուլղարացի լրագրող, ռեժիսոր, սցենարիստ ու օպերատոր Ցվետանա Պասկալևան խոսելով հայկական բանակի անցյալի ու ներկայի, Ճանաչված ու չճանաչված հերոսների մասին`ասաց, որ անցած քսան տարիները նշանակալից են հայկական բանակի ստեղծմամբ:
Ցվետանա Պասկալևայի խոսքով` այն սարսափլի դժվարություններից հետո, երբ չկար մի շրջան, որը չռմբակոծվեր, օղակը սեղմվում էր Ղարաբաղի շուրջը: Այդ իրավիճակում մարտի դաշտում էր գտնվում Արցախի բանակը`կազմված կամավորներից ու փոքրաթիվ ջոկատներից:
«Հետագա սերունդները իրենց հարց պետք է տան` իսկ ինչպե՞ս կարողացան այդ մարդիկ ապահովել անվտանգության օղակի ստեղծումը»,- նշեց նա` ընդգծելով, որ զինադադարի կնքումից հետո ապացուցեցին, որ պատերազմում վճռորոշը թվաքանակը չէ, կան այլ կոմպոնենտներ` կազմակերպվածությունն ու այն փաստը, որ գտնվում ես հայրենիքիդ հողի վրա:
«Բանակը ամեն րոպե պատրաստ է իր առջև դրված նպատակների իրականացմանը: Հայկական բանակը ամենաուժեղն է տարածաշրջանում: Ցավոք, եթե այսօր հայերն ու արցախցիները կանգնած են պատերազմի վտանգի առաջ, ուրեմն բանակը պետք է պատրաստ լինի պատերազմին»,- ասաց նա:
Նրա խոսքով` այդ պատերազմին մասնակցած մարդիկ մերօրյա հերոսներն են, ինչը ինքը փորձել է ցույց տալ իր ֆիլմերով:
Պասկալևան ցավով նշեց, որ իր անցկացրած հարցումները ցույց են տվել, որ շատերը, բացի Մոնթեից, այլ հերոսի չեն ճանաչում, ինչը, ըստ նրա, բոլորիս բացթողումն է:
«Բանակը ոչ թե ռազմական տեխնիկան է, այլ այն սերունդը, որը կրում է զինվորական հագուստ, այն երիտասարդները, ովքեր տեխնիկապես տիրապետում են ռազմական տեխնիկային: Ուրախ եմ, որ այդ երեխաները սովորում են օտար լեզուներ, սպաները պատրաստված են ու ի վիճակի պատասխանել ցանկացած հարցի»,- նշեց նա:
Ինչ վերաբերում է տեղեկատվական պատերազմին, ապա նա ընդգծեց, որ հայկական կողմը պասիվ է ու զիջում է Ադրբեջանին: Նրա խոսքով` հայերին միշտ թվում է` աշխարհը գիտի իրենց ճշմարտացիության մասին, ինչը բնավ էլ այդպես չէ` պետք է օգտագործել ցանկացած հնարավորություն` ճշմարտացիությունն ապացուցելու համար:
«Ադրբեջանը անընդհատ ստեր փչելով առաջ է տանում իր կեղծիքը: Հայաստանը պետք է արձագանքի՝ իր ճշմարտացիությունը ցանկացած պարագայում ապացուցելու համար»,- համոզմունք հայտնեց նա` ընդգծելով, որ Հայաստանը պետք է կշռադատված պատասխանի Ադրբեջանին՝ առանց հիստերիայի, հանգիստ:
