Грузия Online-ի փոխանցմամբ՝ ԵՄ-ը շահագրգռված է Վրաստանի, Թուրքիայի և Բուլղարիայի միասնական էներգետիկ ցանցի ստեղծման հարցում Թբիլիսիի հետ համագործակցությամբ։ Այս մասին Դավոսում Վրաստանի վարչապետ Նիկա Գիլաուրիի հետ հանդիպումից հետո հայտարարել է էներգետիկ հարցերով ԵՄ-ի հանձնակատար Գյունթեր Օթթինգերը։
Վերջինս հայտարարել է, որ ԵՄ-ի և Վրաստանի միջև համագործակցության առանցքային հարցերից մեկը էներգետիկան է. «Վրաստանը կարևորագույն տարանցիկ երկիր է տարածաշրջանում։ ԵՄ-ը ցանկանում է Թբիլիսիի հետ համագործակցել Վրաստանի, Թուրքիայի և Բուլղարիայի միասնական էներգետիկ ցանցի ձևավորման հարցում։ Այն շատ շահավետ կլինի բոլոր երկրների համար»։
Նիկա Գիլաուրին իր հերթին լրագրողներին հայտնել է, որ Օթթինգերի հետ հանդիպման ժամանակ քննարկվել է նաև AGRI նախագիծը, որն առնչվում է հեղուկացված գազի փոխադրմանը դեպի Եվրոպա։ Գիլաուրին հավելել է, որ տվյալ նախագծում ներառված են Ադրբեջանը, Վրաստանը, Ռումինիան, Հունգարիան և այլ եվրոպական երկրներ։ Գիլաուրին չի բացառել, որ տվյալ նախագծում կարող են ներգրավվել նաև Ուկրաինան և Միջին Ասիայի երկրները։
Հիշեցնենք, որ նախորդ տարվա դեկտեմբերի սկզբին Վրաստանի էկոնոմիկայի և կայուն զարգացման նախարար Վերա Կոբալիան հայտարարել էր, որ մինչև 2015 թվականը Վրաստանը մտադիր է նոր հիդրոէլեկտրակայանների կառուցման շնորհիվ կրկնապատկել իր էներգետիկ հզորությունը։ Նա հավելել էր, որ, ընդհանուր առմամբ, առաջիկա տարիներին Վրաստանը ներկայումս կառուցվող հիդրոէլեկտրակայանների շնորհիվ կստանա հավելյալ 1500 մեգավատտ էլեկտրաէներգիա։
