ԱՄՆ նախագահ Բարաք Օբաման խոստովանել է, որ իրեն անբասիր նախագահ չի համարում, սակայն համոզմունք է հայտնել, որ իր ընտրած ուղին ճիշտ է, և նշել, որ հույս ունի հաղթել նոյեմբերին կայանալիք նախագահական ընտրություններում: Այս մասին նա հայտարարել է ABC հեռուստաալիքին տված հարցազրույցում:
Օբաման խոստովանել է, որ «շատ ուժեղ» ցանկանում է հաղթել ընտրություններում, քանի որ, իր կարծիքով, «երկիրը դրա կարիքն ունի»: «Ես պատրաստվում եմ ամենալուրջ կերպով պայքարել և կանեմ հնարավոր ամեն բան, որպեսզի մենք շարունակենք շարժվել այն ճանապարհով, որը, իմ կարծիքով, կարող է հանգեցնել ամերիկյան երազանքի իրականացմանը»,- ասել է նա:
Հանրապետական կուսակցության իր ընդդիմադիրներին Օբաման անվանել է չհաջողված քաղաքական փիլիսոփայության հետևորդներ: «Մենք Միթ Ռոմնիի, Նյուտ Գինգրիչի և Ռիք Սանտորումի առաջարկած տեսությունների ինքնատիպ փորձ ունենք: Մենք փորձել ենք շարժվել այդ ուղով 10 տարի, և արդյունքում ունեցել ենք 1930-ականներից հետո աշխատատեղերի ամենալուրջ կրճատումները: Անտրամաբանական է ընդունել այն, ինչը մենք արդեն փորձել ենք, և ինչը չի աշխատել»,- ասել է Օբաման՝ նկատի ունենալով ֆինանսական և հարկային քաղաքականության հարցում հանրապետականների առաջարկները: Փոխարենը նա առաջարկել է բարձրացնել հարուստների, մասնավորապես միլիոնատերերի և միլիարդատերերի հարկերը:
Միաժամանակ Օբաման խոստովանել է, որ ինքն էլ հեռու է կատարելությունից: «Ես սխալվում եմ ամեն ժամ, ամեն օր: Աշխատանքում միշտ բաներ կան, որոնք պետք է սովորել: Եվ ես կասկած չունեմ, որ այժմ, որպես նախագահ, ես ավելի լավն եմ, քան այն օրը, երբ առաջին անգամ որպես պետության նախագահ մտա Սպիտակ տուն»,- խոստովանել է Օբաման:
