Անցյալ տարվա ձմռանը Եգիպտոսում տեղի ունեցած զանգվածային ժողովրդական ցույցերի ժամանակ երկրի նախագահ Հոսնի Մուբարաքը ցուցարարների վրա կրակելու հրաման չի արձակել: Այս մասին դատավարության ժամանակ հայտարարել է երկրի ներքին գործերի նախկին նախարար Հաբիբ Ալ-Ադլին:
Ինչպես հաղորդում է РИА Новости-ն, խոսելով հեղափոխության օրերին սեփական դիրքորոշման մասին՝ նախկին նախարարը նշել է, որ իրեն կարգադրել են «առավելագույն զսպվածություն և կարգապահություն ցուցաբերել, պաշտպանել և պահպանել հանրային սեփականությունը»:
«Եվ ինչպե՞ս ես կարող էի կարգադրել կրակել իմ քույրերի և եղբայրների վրա»,- դատավորին հարց է տվել Ալ-Ադլին:
Իր հերթին ՆԳ նախկին նախարարի փաստաբանը մեղադրել է Կահիրեի Ամերիկյան համալսարանի անվտանգության աշխատակիցներին, որ հենց նրանք են կրակել խաղաղ ցուցարարների վրա (համալսարանը գտնվում է Թահրիր հրապարակում, որտեղ տեղի էին ունենում ցույցերը): Բացի այդ, Ալ-Ադլիի պաշտպանը նշել է, որ «այդ օրերի իրադարձությունները երրորդ ուժի սադրանքներ են եղել»: Որպես ասվածի ապացույց՝ նա հիշեցրել է այդ օրերին հրապարակում կատարցու և պաղեստինցու ձերբակալությունները, որոնց մոտ հրաձգային զենք էր հայտնաբերվել:
2011 թ. օգոստոսից Կահիրեի ոստիկանության ակադեմիայի շենքում ընթանում է Եգիպտոսի նախկին նախագահ Հոսնի Մուբարաքի, նրա երկու որդիների՝ Ալայի և Գամալի, ՆԳ նախկին նախարար Հաբիբ Ալ-Ադլիի և վերջինիս 6 տեղակալների դատավարությունը: Եգիպտոսի նախկին բարձրագույն ղեկավարությունը մեղադրվում է հեղափոխության օրերին ցուցարարների վրա կրակելու հրաման արձակելու և կոռուպցիայի մեջ: Մեղադրյալներն ամբողջությամբ հերքում են իրենց ներկայացված մեղադրանքները:
