Այսօր ՀՀ վերաքննիչ քրեական դատարանում սփյուռքահայ ներդրող Էդմոնդ Խուդյանի կողմից ներկայացված բողոքի քննության ժամանակ դատավոր Եվա Դարբինյանը հարցեր ուղղեց դատախազին, որոնց տրված պատասխաններից այնպիսի տպավորություն ստեղծվեց, որ դատախազ Հովհաննիսյանը մոռացել էր, ինչ նիստի է մասնակցում, կամ էլ պարզապես ի սկզբանե գործին ծանոթ չէր: Դատավորը ցանկանում էր իմանալ, թե ի սկզբանե ում դիմումի հիման վրա էր կանխամտածված սնանկության հոդվածով գործ հարուցվել:
Դատախազ Հովհաննիսյանը կարկամելով մի քանի անուններ նշեց, հետո նրան այդ մասին փորձում էր հուշել նախաքննական մարմնի ներկայացուցիչ Հարությունյանը, սակայն, ինչպես ավելի ուշ պարզվեց, վերջինս էլ իրականում սխալ էր հուշում: Ի վերջո իրավիճակը պարզաբանեցին Էդմոնդ Խուդյանի ներկայացուցիչները:
Էդմոնդ Խուդյանն դատարան ներկայացրած բողոքով պահանջում է շուրջ 7 մլն ԱՄՆ դոլարի չափով պատճառված վնասի համար իրեն ճանաչել տուժող, որից հետո նա արդեն կկարողանա ներկայացնել իր մոտ առկա ապացույցները:
Այսօրվա դատական նիստի ընթացքում Էդմոնդ Խուդյանի ներկայացուցիչները ներկայացրեցին և հիմնավորեցին նրան տուժող ճանաչելու վերաբերյալ իրենց պահանջը: Արդյունքում դատավորը փորձեց դատախազից և նախաքննության մարմնի ներկայացուցչից պարզել Խուդյանին տուժող չճանաչելու պատճառը: Ըստ նախաքննության մարմնի ներկայացուցչի պատճառն այն է, որ նախաքննությունը դեռեւս շարունակվում է:
Դատական նիստը հետաձգվեց մինչև փետրվարի 6-ը, և դատավորը քննիչից պահանջեց ներկայացնել դիմող կողմի տվյալները, սնանկության վերաբերյալ փաստաթղթերը և Խուդյանի ընկերության կանոնադրությունը, որից էլ պարզ կդառնա՝ իրականում կա՞ արդյոք սփյուռքահայ ներդրողին տուժող չճանաչելու լուրջ պատճառ: