Ադրբեջանական APA լրատվական գործակալությանը տված հարցազրույցի ժամանակ Ադրբեջանում Թուրքիայի դեսպան Հուլուսի Քըլըչն անդրադարձել է Ֆրանսիայի Սենատի կողմից Հայոց ցեղասպանության հերքումը քրեականացնող օրինագծի այսօրվա քննարկմանը.
«Մենք ակնկալում ենք, որ Ֆրանսիայի Սենատը կառաջնորդվի առողջ մտածելակերպով, ինչպես որ նրա Սահմանադրական հանձնաժողովը, որը եկավ այն եզրակացության, որ այդ օրինագիծը հակասում է երկրի Սահմանադրությանը։ Թուրքիայից հեռու գտնվող այլ երկրի քաղաքական գործիչների կողմից Թուրքիայի պատմության քննարկումը հակասում է միջազգային իրավունքին և հանդիսանում է անհարգալից վերաբերմունք թուրք ժողովրդի հանդեպ։
Եթե Ֆրանսիայի Սենատը քվեարկի այդ օրինագծի օգտին, ապա Ադրբեջանն ու Թուրքիան հանդես են գալու ԵԱՀԿ Մինսկի խմբից Ֆրանսիային դուրս մղելու նախաձեռնությամբ, քանի որ նա դադարում է անկողմնակալ երկիր լինելուց»։
Հիշեցնենք, որ նախորդ տարվա դեկտեմբերի 22-ին Ֆրանսիայի Ազգային ժողովի կողմից Հայոց ցեղասպանության հերքումը քրեականացնող օրինագծի ընդունումից հետո Թուրքիայի նախագահ Աբդուլլահ Գյուլը հայտարարել էր, թե Ֆրանսիան պետք է դուրս գա ԵԱՀԿ Մինսկի խմբի կազմից, որը զբաղվում է Ղարաբաղյան հակամարտության կարգավորմամբ։