2012 թ. պետական բյուջեից ՀՀ կառավարության պարտքի սպասարկման գծով տոկոսավճարի և մայր գումարի մարման համար նախատեսված է շուրջ 402.6 մլն դոլար (157 մլրդ դրամ): «Առաջին լրատվական»-ի հետ զրույցում տնտեսագետ Սամվել Ավագյանը տեսակետ հայտնեց, որ դոլար-դրամ փոխարժեքի տատանումները հնարավոր է ազդեն այս տարի արտաքին պարտքի սպասարկման ու մարման վրա: Սակայն հաշվի առնելով, որ բյուջեն ունի նաև արտարժութային եկամուտներ, հնարավոր է, որ այդ ազդեցությունը մեծ չլինի կամ նույնիսկ ընդհանրապես չզգացվի, քանի որ բյուջեն իր արտարժութային եկամուտներից է իրականացնելու սպասարկումը:
«Չեմ կարծում, որ այդտեղ մեծ խնդիր կա: Ուղղակի կարող է վերահաշվարկի ժամանակ ինչ-որ ցուցանիշներ փոխվեն: Բայց սպասարկման ծավալը դեռ կրիտիկական կետի չի հասել, որ խոսենք Հայաստանից արժութային ռեսուրսի դուրս գալու մասին»,- ասաց Ս. Ավագյանը:
Հիշեցնենք, որ 2011 թ. տարեվերջի դրությամբ՝ ՀՀ պետական պարտքը կազմել է 1 տրլն 596 մլրդ դրամ կամ 4 մլրդ 138 մլն ԱՄՆ դոլար, որից ՀՀ կառավարության պարտքը կազմել է 1 տրլն 355 մլրդ դրամ կամ 3 մլրդ 511 մլն ԱՄՆ դոլար: