Մարոկկոյի մայրաքաղաքում Կրթության նախարարության շենքի մոտ իրականացվող ցույցի ժամանակ հինգ երիտասարդներ փորձել են ինքնահրկիզվել: Այս մասին հայտնում է Euronews-ը:
Արդեն մի քանի օր է` Ռաբատում տեղի են ունենում ցույցեր` ուղղված գործազրկության բարձր մակարդակի դեմ, որի ցուցանիշը բարձրագույն ուսումնական հաստատություններն ավարտածների շրջանում կազմում է 16 տոկոս: Երիտասարդները փորձել են իրենց այրել, երբ ոստիկանությունն արգելել է այլ ցուցարարների մոտենալ իրենց` թույլ չտալով ջուր և սնունդ վերցնել:
Բժիշկների օպերատիվ գործողությունների արդյունքում երիտասարդներից երկուսին տեղափոխել են Կասաբլանկայի հիվանդանոցի այրվածքաբանության բաժանմունք: Մյուս երկուսը ստացել են թեթև վնասվածքներ, իսկ հինգերորդ երիտասարդի միայն հագուստն էր այրվել:
Ցուցարարները նոր կառավարությանը ցանկանում են ներկայացնել իրենց ծրագիրը, որն ուղղված է տնտեսական աճի նվազման, ինֆլյացիայի, կոռուպցիայի և անգրագիտության դեմ:
Ինքնահրկիզման գործողությունները վերջին շրջանում տարածվել են Մերձավոր Արևելքի և Հյուսիսային Աֆրիկայի երկրներում: Թունիսում մեկ տարի առաջ առևտրականի ինքնահրկիզմամբ արաբական երկրներում մեկնարկեց հեղափոխական ալիքը: