«Լրագրողները հանուն մարդու իրավունքների» հասարակական կազմակերպության ղեկավար, իրավապաշտպան Ժաննա Ալեքսանյանի խոսքով, պաշտպանության նախարարության քննչական ծառայությունը և զինվորական դատախազությունը ճնշում են բանեցնում իր նկատմամբ` փորձելով իրեն հետ պահել բանակում շարունակվող, հաճախ մահվան ելքերով միջադեպերի քննությանը անդրադառնալուց: Այս մասին նա ասաց «Առաջին լրատվական»-ի հետ զրույցում:
Ժաննա Ալեքսանյանը տեղեկացրեց, որ այսօր առավոտյան արդեն երկրորդ անգամ իրեն կանչել են պաշտպանության նախարարության քննչական ծառայություն` հարցաքննության:
Իրավապաշտպանի խոսքով, հարցն առնչվում է դեռ անցած տարի սեպտեմբերին Լեռնային Ղարաբաղի «Եղնիկներ» կոչվող զորամասում ժամկետային ծառայող շարքային Ժորա Մկրտչյանի հետ տեղի ունեցած միջադեպին:
Շարքայինի հոր` Մկրտիչ Մկրտչյանի ներկայացմամբ, 2011-ի սեպտեմբերին նշված զորամասում ծառայակիցիները ստորացրել են Ժորայի արժանապատվությունը, բռնության և ծաղրուծանակի են ենթարկել նրան, նույնիսկ ծխախոտ են հանգցրել մարմնին, ինչի հետևանքով 19-ամյա զինծառայողը «սուր պսիխոզ» ախտորոշմամբ հայտնվել էր Երևանի կայազորի հոսպիտալում: Լրատվամիջոցներում հրապարակումներ էին եղել, որ զինծառայողը նաև սեռական բռնության է ենթարկվել, ինչը հետագայում դատաբժշկական փորձաքննությամբ հերքվել էր:
«Ես սեռական բռնության մասին որևէ բան չեմ ասել, և, ընդհանրապես, իմ հրապարակման մեջ չեմ գրել տղայի անունը, չեմ անդրադարձել սեռական բռնության խնդրին», – ասաց Ժաննա Ալեքսանյանը: «Բայց օրեր անց` ինձ քննչական ծառայությունը կանչում էր, ասելով, որ ես եմ հայտնել սեռական բռնության մասին տղայի հորը»:
Իրավապաշտպանը ընդգծում է` դա «բացարձակապես» իրականությանը չի համապատասխանում և պնդում է, որ ինքը զինծառայողի հորը սեռական բռնության վերաբերյալ որևէ տեղեկություն չի հայտնել: Ավելին, Ժաննա Ալեքսանյանի խոսքով, Ժորա Մկրտչյանին զորամասում սեռական բռնության ենթարկելու մասին տեղեկությունը առաջինը հրապարակել է լրատվական կայքերից մեկում, և այդ կապակցությամբ լրատվամիջոցներում տեղ գտած հետագա նյութերը ելնում են նշված հրապարակումից, սակայն չգիտես ինչու` հարցաքննության կանչում են իրեն:
