ՀՀ ոստիկանությունից «Առաջին լրատվական»-ին տեղեկացրին, որ այսօր՝ հունվարի 18-ին, ժամը 00.30-ին, ոստիկանության ծառայողները խուլիգանություն կատարելու կասկածանքով Երևանի Արծրունու փողոցից Արաբկիրի բաժին բերման են ենթարկել 1963 թ. ծնված Աշոտ Ա.-ին:
Պարզվել է, որ նույն օրը, ժամը 00.15-ին, 1981 թ. ծնված Գարիկ Ն.-ն Կոմիտասի պողոտայի և Գրիբոյեդովի փողոցի խաչմերուկում «ՎԱԶ» մակնիշի ավտոմեքենայով բախվել է առջևում կայանված «ԲՄՎ X-6» մակնիշի ավտոմեքենային, որի վարորդ Աշոտ Ա.-ն իջնելով մեքենայից` սեռական բնույթի հայհոյանքներ է տվել Գարիկ Ն.-ին, ծեծի ենթարկել նրան ու պատճառել վնասվածքներ:
Նշանակվել է դատաբժշկական փորձաքննություն:
Հարուցվել է քրեական գործ ՀՀ քրեական օրենսգրքի 258 հոդվածի 3-րդ մասի 4-րդ կետի հատկանիշներով:
Աշոտ Ա.-ն ձերբակալված է:
Կատարվում է նախաքննություն
«Առաջին լրատվական»-ի տեղեկություններով` ձերբակալվածը նույն ինքը Աշոտ Ավետիսյանն է, որը «Նեպտուն» ՍՊԸ-ի տնօրենն է: Նա հանրությանն ավելի շատ հայտնի է «Բանգլադեշցի Համիկ» մականվամբ և «ՏԷՑ-ի կրուգում» 2005-ի փետրվարի 4-ին տեղի ունեցած «ռազբորկա»-ին մասնակցության համար կարճատև պահվել է անազատության մեջ:
Մի քանի հարյուր մարդու մասնակցությամբ այդ «ռազբորկա»-ի դեպքի վայրից իրավապահները առգրավել էին 20-ից ավել զինատեսակների մի քանի հազար պարկուճ: Այդ «ռազբորկա»-ին մասնակցել «Բանգլադեշցի Համիկը», որը համարվում է ԲՀԿ նախագահ Գագիկ Ծառուկյանի մերձավոր անձանցից մեկը:
