2012 թ. պետբյուջեն ապահովելու համար կան մի շարք գործոններ, բյուջեի կատարման հիմնական հանգամանքը կապված է տնտեսական աճի հետ, որը հավանաբար կկազմի 4%-ից ավելին:
Ինչպես այսօր ասուլիսի ժամանակ ներկայացրեց Պետական եկամուտների կոմիտեի փոխնախագահ Արմեն Ալավերդյանը` հաջորդ գործոններն են հարկային-մաքսային վարչարարությունը, հարկային փոփոխությունները, որոնք, նախնական գնահատականներով, ԱԺ-ում ընդունված փոփոխությունները կապահովեն շուրջ 14 մլրդ դրամ:
Ա.Ալավերդյանի խոսքով` ընտրական տարում պարտադիր սոցվճարների հավաքման հետ կապված ռիսկեր առանձնապես չկան, տարեվերջին իրականացվել են լուրջ նախապատրաստական միջոցառումներ տարածքային մարմիններին զինելու ուղղությամբ, որպեսզի այդ ընթացքը սահուն կերպով ապահովվի:
ՊԵԿ փոխնախագահի խոսքով` ներկայում հարկ վճարողների տարբեր խմբերի հետ հանդիպումներ են ունենում, հրավիրվում են խոշոր ԱԱՀ վճարողներին, նրանց, որոնց վրա է հիմնական հարկային բեռը: Ըստ բանախոսի` 3-4 հազար հարկ վճարողները վճռական նշանակություն ունեն, ԱԱՀ վճարող են և ապահովում են եկամուտների 80%-ը: Ա. Ալավերդյանի կանխատեսումներով` այս տարի այդ ցուցանիշը ևս կպահպանվի, խոշորները այս տարի ևս 60%-ից պակաս չի լինի:
Նա խոստացավ, որ ՓՄՁ-ներին չեն անհանգստացնելու և աշխատելու են ռիսկի գործոնների հիման վրա. «Ընտրական տարում ստուգման ենթակա կազմակերպությունների սուբյեկտիվ կարգով ստուգում իրականացնելը պատմության գիրկն է անցել, ստուգման ենթակաների ցանկը հրապարակվել է` մոտ 3800 կազմակերպություն, բայց եթե նոր հանգամանքներ ի հայտ գան, ապա վարչապետի որոշման հիման վրա միայն կկարողանանք ստուգում իրականացնել այն կազմակերպությունների մոտ, որոնք ցանկում չեն ընդգրկվել»:
Անդրադառնալով «Փարիզյան սուրճ»-ի սեփականատեր Գործունյանի որոշմանը ընկերությունը վաճառելու մասին` Ա. Ալավերդյանը նշեց, որ եթե մի սուբյեկտ որոշել է տվյալ գործունեությամբ չզբաղվել, այդ «տեղը դատարկ չի մնա»: Նա շեշտեց, որ դա գործարարի որոշումն է` ներդրում կատարել որակի բարձրացման համար, թե ոչ:
Միաժամանակ ՊԵԿ փոխնախագահը հայտարարեց, թե 24 ժամի խնդիր չի դրվել, մեր օրենսդրությամբ նման հարց չկա, իսկ եթե հարկային վճարումը չի կատարվում` հաշվի վրա է կալանք դրվում, հետո գույքն է բռնագանձվում, 180 օր անց սնանկության հարց է դրվում:
