Իսրայելի ռազմական բարձրաստիճան պաշտոնյան այսօր ասել է, որ միջուկային Իրանը կարող է Իսրայելի համար դժվարացնել իր թշնամիների դեմ գործելը:
Գեներալ Ամիր Էշելն ասել է, որ եթե Թեհրանը ստեղծի միջուկային զենք, դա կարող է Իսրայելին հետ պահել Լիբանանում և Գազայում Իրանի կողմից պաշտպանվող իսլամիստական խմբերի դեմ պայքարելուց:
Ինչպես հաղորդում է Associated Press-ը, Էշելն ասել է, որ եթե իրենք ստիպված լինեն գնալ ռազմական գործողությունների, Իրանի միջուկային զենք ունենալու դեպքում ամեն ինչ արդեն այլ կլինի:
Նա նաև զգուշացրել է, որ միջուկային զենքով զինված Իրանն ատոմային զենքի արշավ կսկսի ամբողջ տարածաշրջանում, որը կառաջացնի «համաշխարհային միջուկային ջունգլի»:
Իսրայելը տարիներ շարունակ աշխարհին զգուշացրել է, որ Իրանին չպետք է թույլատրվի զարգացնել տեխնոլոգիա, որի միջոցով հնարավոր է միջուկային զենք ստեղծել: Իսրայելն անհանգստանում է, որ Իրանը կարող է վտանգ ներակայացնել երկրի գոյատևման համար, և ասել էր, թե հնարավոր է, որ ռազմական գործողություն սկսի Իրանի դեմ, եթե միջազգային պատժամիջոցները չկարողանան դադարեցնել Թեհրանի միջուկային ծրագիրը: