ՀՀ արտգործնախարար Էդվարդ Նալբանդյանն այսօր ամփոփեց արտգործնախարարության աշխատանքները` նշելով, որ դրանք ուղղված են եղել Հայաստանի արտաքին անվտանգության ապահովմանը, մեր երկրի հեղինակության ամրապնդմանը, միջազգային ասպարեզում Հայաստանի դիրքորոշումների ներկայացմանը, միջազգային կազմակերպություններում և գործընթացներում ներգրավվածության խորացմանը: Ըստ նրա` ՀՀ-ի հեղինակությունը, որպես գործընկերոջ, միջազգային հանրությունում մեծացել է:
2011-ին լրացավ մեր անկախության 20-ամյակը, և այն եղավ յուրահատուկ ստուգատես` արտաքին քաղաքականության ոլորտում գրանցված ձեռքբերումների ամփոփման առումով:
Խոսելով ԼՂ խնդրի մասին` Նալբանդյանը նշեց, որ 2011-ին վերահաստատվեց վերջին տարիներին արձանագրված Հայաստանի և միջազգային հանրության դիրքորոշումների ներդաշնակությունը: Նա մասնավորապես ընդգծեց մարտի 5-ին` Սոչիում, մայիսի 26-ին` Դովիլում, հունիսի` 24-ին Կազանում և դեկտեմբերի 6-ին Վիլնյուսում ընդունված հայտարարությունները: Նշեց նաև, որ հաշվետու տարին նշանավորվեց հայ-ռուսական ռազմավարական և դաշնակցային փոխգործակցության առավել ամրապնդմամբ, և հենց անցնող տարում տեղի ունեցավ ՀՀ նախագահի առաջին պետական այցը ՌԴ:
Նրա խոսքերով` նոր մակարդակի վրա են ԱՄՆ-ի հետ հարաբերությունները, կատարվել են բարձր մակարդակի փոխայցելություններ: «Առավել խորացել են Ֆրանսիայի հետ բարեկամական հարաբերությունները: Ֆրանսիայի նախագահի պետական այցը Հայաստան պատմական էր»:
Արտգործնախարարը տեղեկացրեց, որ լուրջ առաջընթաց է արձանագրվել եվրոպական ընտանիքի հետ մերձեցման գործընթացում. «ԵԽ-ն հաստատել է մուտքի արտոնագրի ռեժիմի դյուրացման շուրջ բանակցությունների մանդատը»:
Հայ-թուրքական հարաբերությունների կարգավորման գործընթացի մասին խոսելով` Նալբանդյանը տեղեկացրեց, որ վերահաստատվել է միջազգային հանրության աջակցությունը հայ-թուրքական հարաբերությունների` առանց նախապայմանների կարգավորման Հայաստանի սկզբունքային դիրքորոշմանը, իսկ Թուրքիայի ապակառուցողական մոտեցումները համապատասխան վերաբերմունքի են արժանացել միջազգային հանրության կողմից:
Նալբանդյանը նկատեց. թեև արաբական մի շարք երկրներում տեղի ունեցած իրադարձություններին` քայլեր են ձեռնարկվել նաև այդ երկրների հետ բնականոն հարաբերությունների պահպանման ուղղությամբ:
Նա տեղեկացրեց, որ 2011-ին ՀՀ նախագահը իրականացրել է 25 օտարերկրյա այց, իսկ Հայաստան է այցելել 7 երկրի ղեկավար: ԱԺ նախագահի մակարդակով տեղի է ունեցել 8 փոխայցելություն, վարչապետի` 12, իսկ ինքը կատարել է 39 օտարերկրյա այց, Հայաստան են այցելել 14 արտգործնախարար և միջազգային կազմակերպության ղեկավար:
