Առնվազն ութ մարդ է զոհվել զբոսաշրջության համար նախատեսված «Կոստա Կոնկորդիա» նավի վթարի հետևանքով, որը ծանծաղուտի մեջ հայտնվել է մնացել Միջերկրական ծովում` Իտալիայի ափերից ոչ հեռու: Այս մասին հաղորդում է ANSA-ն:
Նշվում է, որ զոհերի թիվը կարող է աճել, քանի որ աղետից հետո որոշ ուղևորներ նավից վրայից նետվել են սառը ջուրը, և նրանց ճակատագրի մասին ոչ մի տեղեկություն չկա:
Միևնույն ժամանակ France-Presse գործակալությունը նշում է, որ փրկարարական աշխատանքները դեռ շարունակվում են: 30 մարդ ծանր վնասվածքներ է ստացել: Գրոսսետո քաղաքի քաղաքապետի վկայությամբ, նավում դեռ մնում է 200 մարդ:
«Կոստա Կոնկորդիա» նավը ծանծաղուտում է հայտնվել Ջիլյո կղզու ափերին մոտ հունվարի 14-ի գիշերը: Նավում եղել է 3200 ուղևոր և անձնակազմի ավելի քան 1000 անդամ: Մեծամասնությունը տարհանվել է փրկարարակական նավակներով և տեղափոխվել կղզի: Իշխանությունները նրանց տեղավորել է դպրոցներում, մանկապարտեզներում, հյուրանոցներում և եկեղեցիներում:
Հաղորդվում է, որ նավում եղել են 1000 իտալացի, 500 գերմանացի և 160 ֆրանսիացի: