Վրացական GHN լրատվական գործակալության փոխանցմամբ՝ Վրաստանում ընդունված նոր Ընտրական օրենսգրքի համաձայն՝ Վրաստանի նախագահը կարող է ընտրությունները նշանակել շաբաթվա յուրաքանչյուր օր, սակայն դա չի վերաբերում նախագահական ընտրություններին ու հանրաքվեին։ Բացի այդ, խորհրդարանական (2012) ու նախագահական (2013) ընտրությունների անցկացման ժամկետը կհաստատվի հոկտեմբերին։
Հին Ընտրական օրենսգրքի համաձայն՝ նախագահական ընտրությունների առաջին փուլը պետք է տեղի ունենար հաջորդ տարվա ապրիլի երկրորդ շաբաթվա ընթացքում՝ Սաակաշվիլիի ընտրվելուց 5 տարի անց։
Նշվում է, որ Սաակաշվիլին ընտրվել է 2008 թվականի հունվարին։ Համաձայն հին Ընտրական օրենսգրքի՝ նրա լիազորությունների ժամկետը լրանում է 2013 թվականի ապրիլին, սակայն նոր օրենսդրության համաձայն՝ Վրաստանի նոր նախագահն ընտրվելու է 2013 թվականի հոկտեմբերին։
Հիշեցնենք, որ Վրաստանի նոր Ընտրական օրենսգիրքն ընդունվել է նախորդ տարեվերջին և ուժի մեջ է մտել հունվարի 11-ին։
