Այս տարի ՀՀ մշակույթի նախարարության համար գերակա է համարվել Հայ գրավոր ժառանգության, գրքի, գրքարվեստի և տառարվեստի հանրահռչակումն ՀՀ-ում և արտերկրում:
Այս տարի կյանքի կկոչվի «Երևանը 2012թ. Գրքի համաշխարհային մայրաքաղաք» ծրագիրը, որի շրջանակում նախատեսված է մասնակցել թվով 14 գրքի միջազգային տոնավաճառների, 20 գրական համաժողովների, փառատոների, ցուցահանդեսների:
Մշակույթի նախարարությունն այս տարի պետք է իրականացնի 8 մանկական հանրապետական միջոցառումներ Հայաստանում, հիմնադրի Գրքի թանգարան, մասնակցի Հայկական տառարվեստի թվով 3 համալիրների ստեղծմանը:
Միջացառումների շրջանակում այս տարի կմեկնարկի ՀՀ Արմավիրի մարզի Այգեշատ համայնքի Թարգմանչաց եկեղեցու վերականգնման ծրագիրը:
Ծրագրով նախատեսված է ներդնել Մշակութային ծառայությունների ոլորտում էլեկտրոնային տեղեկատվական համակարգեր, մասնավորապես պետք է ստեղծվի 2 վիրտուալ թանգարան (գորգի և գրատպության) և 1 մանկական սրահ, պետք է կազմակերպվի վիրտուալ թեմատիկ ցուցադրություններ, նախատեսված է գործարկել Էլեկտրոնային տեղեկատվական 20 կրպակ:
Ինչ վերաբերում է գրադարաններին, ապա Հայաստանի գրադարանների միացյալ ավտոմատացված ցանցում այս տարի կմուտքագրվի 376000 միավոր գիրք: Բացի այդ` 4 համերգային դահլիճներում կգործարկվի տոմսերի էլեկտրոնային վաճառքը:
Այս տարի մշակութային ծառայություններ մատուցող մասնագետները կվերապատրաստվեն (100 թանգարանային աշխատողներ, 90 համայնքային գրադարարանավարներ, 800 երաժշտություն դասավանդողներ):
3 վերանորոգված թանգարաններում նոր մշտական ցուցադրություններ կձևավորվեն (Ա. Բակունցի տուն-թանգարան, Ե. Չարենցի անվան գրականության և արվեստի թանգարան, Ա. Սպենդիարյանի տուն-թանգարան): Նախատեսված է արդիականացնել Ալ. Սպենդիարյանի անվան օպերայի և բալետի ազգային ակադեմիական թատրոնի շենքի նյութատեխնիկական և մասնագիտական բազան:
Պետություն-մասնավոր համագործակցության ներքո կտրվի պատմաճարտարապետական հուշարձանների վերանորոգման ծրագրի մեկնարկը:
2012թ. նախատեսվում է իրականացնել 3 (Օձունի Աբ. Հովհաննես եկեղեցի, Մխիթար Գոշի դամբարան, 1827 թ. Ռուս-պարսկական պատերազմում զոհված ռուս մարտիկներին նվիրված Օշականի հուշարձան) պատմամշակութային անշարժ հուշարձանների վերականգնումն ու մասնակի ամրակայումը:
