Հայաստանի Հանրային հեռուստաընկերությունը չի դիմել Եվրոպական հեռարձակողների միությանը (EBU)` Բաքվում կայանալիք «Եվրատեսիլ-2012» մրցույթին մասնակցելու համար անվտանգության հատուկ պայմաններ ապահովելու հայտով:
Այս մասին «Մեդիամաքս»-ի հետ զրույցում ասել է «Եվրատեսիլ»-ի անցկացման պատասխանատու Սիետսե Բաքերը:
Ավելի վաղ Հ1-ի պաշտոնական ներկայացուցիչ Գոհար Գասպարյանն ասել էր, որ Երևանում դեռ վերջանական որոշում չի կայացվել «Եվրատեսիլ»-ում Հայաստանի մասնակցության կապակցությամբ:
Նրա խոսքով` Հ1-ը դիմել է EBU-ին հայաստանյան պատվիրակության անվտանգության երաշխիքների համար և սպասում է պատասխանի:
Ս. Բաքերն ասել է, որ «մենք նախորդ տարվա հունիսից երկխոսություն ենք վարում Հ1-ի հետ` «Եվրատեսիլ-2012» մրցույթում իրենց մասնակցության առնչությամբ»:
«Ներկայում չենք կարող ո՛չ հաստատել, ո՛չ հերքել իրենց մասնակցության հարցը, քանի որ մտադիր ենք մասնակիցների ամբողջական ցուցակը հրապարակել հաջորդ շաբաթ և չենք մեկնաբանում առանձին պետությունների մասնակցության հարցը»,- ասել է Ս. Բաքերը:
«EBU-ն անվտանգության երաշխիքներ չի տրամադրում, քանի որ դա մեր գործառույթը չէ: Սակայն մենք անվտանգության երաշխիքներ և ծառայություններ ստանալու հայտով դիմում ենք տեղական հեռարձակողին կամ համապատասխան իշխանություններին:
Ինչ վերաբերում է այս տարվա մրցույթին, մենք Ադրբեջանի վարչապետից անվտանգության երաշխիք ենք ստացել բոլոր պատվիրակությունների համար:
Բացի այդ, նախորդ տարվա օգոստոսին Բաքվի քաղաքային իշխանությունների հետ քննարկվել է հայաստանյան պատվիրակության հավանական մասնակցության հարցը, որի նպատակն էր հաստատել, որ անվտանգության երաշխիքները տարածվելու են նաեւ հայաստանյան պատվիրակության վրա:
Բոլոր հավանական մասնակիցները, այդ թվում `Հ1-ը, տեղեկացվել են Ադրբեջանի վարչապետի կողմից տրված երաշխիքների մասին», – ասել է նա:
