Նախորդ ընտրությունների ժամանակ վստահ էին, որ Հայաստանը կդառնա բարգավաճ օրինաց երկիր, սակայն այդպես չստացվեց: Կձևավորվի նոր կոալիցիա, կլինի ուժերի վերաբաշխում. անդրադառնալով 2011 թ. ներքին և արտաքին քաղաքական զարգացումներին, առաջիկայում կայանալիք խորհրդարանական ընտրություններին` կատակով ասաց «Սոցիոմետր» անկախ սոցիոլոգիական կենտրոնի ղեկավար Ահարոն Ադիբեկյանը:
Չբացառելով ՀՅԴ-ի մուտքը կոալիցիա, բացի այդ՝ նշեց, որ ՀԱԿ-ը շանսեր ունի անցնելու Աժ և «Ժառանգության» ու ՀՅԴ-ի անցնելու դեպքում կստեղծվի ուժեղ ընդդիմություն: «Կունենանք ներկայիս խորհրդարանից տարբերվող ու հետաքրքիր Ազգային ժողով»,- նշեց նա:
Ինչ վերաբերում է կուսակցությունների նախընտրական քարոզարշավին, ապա նա նկատեց, որ առաջիններից մեկը «Բարգավաճ Հայաստանն» է շուտ է սկսել իր քարոզարշավը: «ԲՀԿ-ն հավատում է, թե ունի չորս հարյուր հազար ընտրող, բայց դա իրատեսական չէ»,- նկատեց նա` հավելելով, թե այս կուսակցության կողմակիցները կողմ են այն բանին, որ ԲՀԿ-ն դուրս չգա կոալիցիայից:
Ինչ վերաբերում է կուսակցությունների հզորություններին, ապա նա նշեց, որ ներկայումս Հանրապետականը երկրում ունի 200 շտաբ, «Բարգավաճ Հայաստանը»` 100, ՕԵԿ-ը` 120 շտաբ, ՀՅԴ-ն` 50: Ըստ նրա` բավական թույլ են «Ժառանգության» հնարավորությունները, քանի որ վերջինիս վարկանիշը հիմնականում խարսված է Րաֆֆի Հովհաննիսյանի անձի վրա:
«Ոչ մի կուսակցություն, սակայն, մեծամասնություն չի կազմի խորհրդարանում»,- ասաց նա` վկայակոչելով իր կենտրոնի հետազոտությունները:
Ինչ վերաբերում է քաղաքական հնարավոր դաշինքներին, ապա սոցիոլոգը նկատեց, որ «մենք խմբային պար համարյա չունենք, մեկը քոչարին է, այն էլ՝ չոբանների պար է»: «Նույնն էլ կլինի ընտրությունների պարագայում: Ինչքան էլ միավորվեն, արդյունք չեն տա»,- հավելեց նա` ընդգծելով, որ չի պատկերացնում «Ժառանգության» ու ՀՅԴ-ի համագործակցությունը ՀԱԿ-ի հետ:
Ինչ վերաբերում է ՀՅԴ-ի և «Ժառանգության»` հարյուր տոկոսանոց համամասնական ընտրակարգով ընտրություններ անցկացնելու նախաձեռնությանը, ապա, ըստ նրա, մեծամասնականից հրաժարումը նշանակում է կտրվել ընտրողներից: «Մեծամասնական ընտրակարգից հրաժարումն ավելի շատ բնորոշ է քաղաքական բարձր ինքնագիտակցություն ունեցող ժողովուրդներին, որոնք ունեն մի քանի հարյուր տարվա զարգացած ընտրակարգ»,- ասաց նա` նկատելով, որ համամասնականում ավելի հեշտ է կեղծել, քան մեծամասնականում:
«Եթե մենք մեծամասնական ընտրակարգը հանենք, անկախ պատգամավորներ չենք ունենա»,- ավելացրեց վերջինս:
