Թուրքական Sabah թերթի փոխանցմամբ՝ 1980 թվականի սեպտեմբերի 12-ին Թուրքիայի պատմության ընթացքում ամենաարյունալի ռազմական հեղաշրջման կազմակերպման մեջ մեղադրվող Թուրքիայի զինված ուժերի գլխավոր շտաբի նախկին (17-րդ) պետ, Թուրքիայի 7-րդ նախագահ Քենան Էվրենը և բանակի պաշտոնաթող գեներալ Թահսին Շահինքայան գտնվելու են ազատության մեջ և դատարան են ներկայանալու ընդամենը մեկ անգամ։
Այժմ եթե նրանց մեղքն ապացուցվի, ապա նրանց գեներալական կոչումները կարող են իջեցվել մինչև շարքայինի։ Բացի այդ, նրանք կարող են զրկվել իրենց ծառայության ընթացքում ստացած պետական պարգևներից։
Հիշեցնենք, որ երկու օր առաջ Անկարայի դատարանն ընդունել էր Էվրենի ու Շահինքայայի կողմից պետական հեղաշրջում կազմակերպելուն առնչվող մեղադրանքը, որով նրանք պաշտոնապես դարձել են կասկածյալներ։ Դատախազը պահանջում է ցմահ ազատազրկել նրանց։
Հիշեցնենք, որ 1917 թվականին ծնված Քենան Էվրենն ավելի վաղ հայտարարել էր, թե կնախընտրի ինքնասպան լինել, քան այդ տարիքում բանտ նստել։
Ի դեպ, մինչև 2010 թվականի աշունը 1980 թվականի սեպտեմբերի 12-ին իրականացված ռազմական հեղաշրջման կազմակերպիչներն օգտվում էին անձեռնմխելիությունից, սակայն 2010 թվականի սեպտեմբերի 12-ին՝ ռազմական հեղաշրջումից ուղիղ 30 տարի անց, Թուրքիայի բնակչությունը հանրաքվեի ժամանակ կողմ արտահայտվեց Էրդողանի կուսակցության առաջարկած Սահմանադրական բարեփոխումների փաթեթին, որում ներառված էր նաև այդ ռազմական հեղաշրջման կազմակերպիչներին անձեռնմխելիությունից զրկելը։
Այն ժամանակ քրդերը նշում էին, որ բարեփոխումների փաթեթին կողմ արտահայտվելու հիմնական պատճառներից մեկը հենց այդ հեղաշրջման կազմակերպիչներին անձեռնմխելիությունից զրկելն էր։
