CNN Türk-ի փոխանցմամբ, Թուրքիայի հիմնական ընդդիմադիր ուժ «Ժողովրդա-հանրապետական» կուսակցության (ԺՀԿ) պատգամավորները դիմել են խորհրդարանին՝ պահանջելով իրենց զրկել պատգամավորական անձեռնմխելիությունից։
Դրանով ԺՀԿ-ն ներկայացնող պատգամավորներն աջակցություն են հայտնել իրենց կուսակցապետ Քեմալ Քըլըչդարօղլուին, ով ավելի վաղ էր խորհրդարանին ներկայացրել այդպիսի դիմում։ Պատգամավորական անձեռնմխելիությունից զրկվելու դեպքում Ստամբուլի դատախազությունը պատրաստ է քրեական գործ հարուցել նրա դեմ։
ԺՀԿ-ն ներկայացնող պատգամավոր Աքիֆ Համզաչեբին լրագրողների հետ զրույցում մեկնաբանել է իրենց որոշումը. «Հնարավոր է, որ երկրում առկա է ֆորմալ սահմանադրություն։ Սակայն եթե այն չի ապահովում մարդու իրավունքները և ազատությունները, չի հենվում ժողովրդի վրա, ապա որևէ սահմանադրության մասին չի կարող խոսք լինել։ Թուրքիայում չկան իրավունքի ու ազատությունների երաշխիքներ։ Թուրքիայում գոյություն չունի սահմանադրություն։ Թուրքիայում դատավորները կախված են ոչ թե ժողովրդից, այլ իշխանություններից»։
Հիշեցնենք, որ ԺՀԿ-ն 550 հոգանոց խորհրդարանում ունի 135 մանդատ։
