Ադրբեջանական APA լրատվական գործակալության փոխանցմամբ՝ ամերիկյան CBSNews հեռուստաալիքը Կասպյան տարածաշրջանն ընդգրկել է աշխարհի այն երեք տարածաշրջանների թվում, որոնցում 2012 թվականին էներգետիկ տարաձայնությունների պատճառով կարող են բռնկվել զինված հակամարտություններ։ Հեռուստաալիքի համար այդպիսի վերլուծություն է կատարել Գլոբալ անվտանգության հարցերով պրոֆեսոր Մայքլ Կլարը։
Վերջինս, հաշվի առնելով համաշխարհային տնտեսության մեջ առկա տնտեսական ռիսկերը, նավթի գների տատանումը, չի բացառում, որ այդ կապակցությամբ զինված հակամարտություններ ծագեն հետևյալ երեք տարածաշրջաններում. Հորմուզի նեղուց, Հարավ-Չինական ծով և Կասպից ծով։
Կլարը, հիշեցնելով, որ Կասպից ծովի նավթի պաշարները կազմում են 48 միլիարդ բարել, իսկ գազային պաշարները՝ 449 տրիլիոն ֆուտ, ընդգծում է, որ այս ամենը համաշխարհային շուկաներ հասցնելու գործընթացը բավական բարդ է. «Տարածաշրջանի էներգետիկ ենթակառույցները բացարձակապես ադեկվատ չեն, Կասպից ծովն էլ իր հերթին ելք չունի դեպի համաշխարհային օվկիանոս, ինչը նշանակում է, որ կասպյան նավթն ու գազը պետք է փոխադրվեն կա՛մ խողովակաշարերով, կա՛մ երկաթուղով։
Ռուսաստանն ու Արևմուտքը պայքարում են նորէներգետիկ խողովակաշարերը վերահսկելու համար։ Այդ պայքարը նոր մակարդակ է ձեռք բերել։ ԵՄ-ը ցանկանում է կյանքի կոչել Nabucco գազատարի նախագիծը, իսկ Ռուսաստանը՝ «Հարավային հոսք» գազատարինը։ Այդ ամենն ի ցույց է դնում, որ Կասպյան տարածաշրջանը մնալու է որպես միջազգային ճգնաժամի կամ հակամարտության աղբյուրներից մեկը»։
