ՀՅԴ-ի և «Ժառանգության»`հարյուր տոկոսանոց համամասնական ընտրակարգով ընտրություններ անցկացնելու նախաձեռնությունը շատ տեղին էր, այդ է պատճառը, որ քաղաքական բազմաթիվ ուժեր արձագանքեցին այդ առաջարկին: Այսօր լրագրողների հետ հանդիպմանը այս մասին հայտարարեց «Ազատ դեմոկրատներ» կուսակցության ներկայացուցիչ Ալեքսանդր Արզումանյանը:
Նրա խոսքով` իրենք մշտապես կողմ են եղել հարյուր տոկոսանոց համամասնական ընտրակարգով ընտրություններ անցկացնելուն, քանի որ մեծամասնական ընտրակարգը բազմաթիվ ընտրակեղծիքների տեղիք է տալիս:
«Մեզ պես չկայացած, ոչ ժողովրդավարական երկրներում իշխանությունը ձգտում է վերարտադրվելու: Մեծամասնական ընտրակարգով անցկացված ընտրությունները այդ հարցում օգնում են նրանց: Բայց ես չեմ բացառում, որ տասը-քսան տարի հետո, երբ քաղաքական համակարգը կայանա, կարողանանք անցում կատարել մեծամասնական ընտրակարգի»,- ասաց Արզումանյանը:
Ասուլիսի մյուս բանախոս` ՀՀԿ-ական պատգամավոր Արտակ Դավթյանն իր հերթին նկատեց, որ հարյուր տոկոսանոց համամասնական ընտրակարգին անցում կատարելու թերությունն այն է, որ այդ ձևը բերում է կուսակցամոլության երևույթների:
«Չեմ կարծում, որ խառը ընտրական համակարգը հարյուր տոկոսով ծառայում է իր նպատակին, չեմ կարծում նաև, որ մեր երկրի համար լիովին հարմար է հարյուր տոկոսանոց համամասնական ընտրակարգը: Ամենից ընդունելին հարաբերական մեծամասնական ընտրակարգն է, որը գործում է աշխարհի ավելի քան քառասուն երկրներում` ԱՄՆ-ում, Մեծ Բրիտանիայում, Կանադայում»,- ասաց Արտակ Դավթյանը:
Պատգամավորի կարծիքով` ճիշտն այն է, որ անցումը որոշակի ընտրակարգի վերապահվի հասարակությանը` հանրաքվեի ճանապարհով: «Միաժամանակ փաստ է, որ համամասնական ընտրակարգով անցկացվող ընտրությունների պարագայում ապագա խորհրդարանում տեղ կունենան երեք-չորս կուսակցություններ»,- համոզմունք հայտնեց ՀՀԿ-ական պատգամավորը:
