«Նովոստի» ակումբում այսօր հյուրընկալվել էր Հայաստանի Հանրապետությունում Ղազախստանի Հանրապետության արտակարգ և լիազոր դեսպան Այիմդոս Բոզժիգիտովը: Նա խոսեց Ղազախստանի առաջիկա արտահերթ խորհրդարանական ընտրությունների մասին:
Ինչպես ներկայացրեց դեսպանը` արտահերթ ընտրությունների անցկացումը և խորհրդարանի արձակումը Ղազախստանի հասարակության կողմից ընկալվեց ըստ արժանվույն: Առաջիկա ընտրութունները հնարավորություն կտան ամրապնդելու օրենսդիր մարմինը, ինչպես նաև կհամապատասխանեցվեն միջազգային չափանիշներին:
«Այս ընտրությունները իշխանություններին հնարավորություն կտան կենտրոնանալու տնտեսական բարեփոխումների վրա»,- նկատեց դեսպանը:
Ըստ Ղազախստանի դեսպանի` երկրի նախագահը կարևորում է ընտրությունները, և դա վկայում է այն մասին, որ պաշտոնական Աստանան պատրաստակամ է` առաջնորդվելու ժողովրդավարական սկզբունքներով:
Յոթ քաղաքական կուսակցություններ են պայքարելու խորհրդարանում տեղեր ստանալու համար, տեղեկացրեց դեսպանը` հավելելով, որ նրանք հնարավորություն ունեն հեռուստաընկերություններով ներկայացնելու իրենց նախընտրական ծրագրերը: Ընտրությունների ընթացքին կհետևեն 937 դիտորդներ:
Դեսպանը նշեց, որ Ղազախստանում հայկական համայնքը, ըստ պաշտոնական տվյալների, ներկայացնում է շուրջ 25 000 մարդ, իսկ ոչ պաշտոնական տվյալներով` 100 000:
