Այս տարվա ընթացքում Microsoft ընկերությունը մի շարք նորույթներ է խոստանում օգտագործողներին: «Առաջին լրատվական»-ի հետ զրույցում ընկերության հայաստանյան մասնաճյուղի տնօրեն Գրիգոր Բարսեղյանը հայտնեց, որ Windows-ի ֆոներն արդեն շուկայում առկա են և հույս հայտնեց, որ դրանք կվայելեն օգտագործողների ուշադրությունը և կբավարարեն նրանց պահանջները, «Օրանժը» և «ՎիվաՍելն» անցած տարվա վերջին սկսեցին ներկայացնել դրանք:
Գ. Բարսեղյանը հայտնեց, որ Microsoft ինովացիոն կենտրոնում և իրենց տեղական գործընկեր ընկերություններում սկսել են հայկական ուղղվածության ծրագրեր, լուծումներ մշակել և բավական թվով արդեն մատակարարել են շուկա:
«Windows 8-ին սպասում ենք անհամբեր և ամեն ինչ անում ենք, որ հենց այս տարի լինի հայերեն տարբերակը: Windows XP-ն, Vista-ն, Microsoft office 10-ն ու 7-ն արդեն կան հայերեն լեզվով: Մեծ սպասելիքներ ունենք, որ ամպային տեխնոլոգիաների ծառայությունները լայնորեն հասանելի կլինեն Հայաստանում»,- նշեց Գ. Բարսեղյանը:
Այս տարվանից ընկերության ղեկավարը նաև մեծ ակնկալիքներ ունի, որ կտրուկ բարելավումներ կլինեն հեղինակային իրավունքների պաշտպանության ոլորտում. «Քանի որ մեր երկրի ամենամեծ ներուժը ստեղծագործ մարդիկ են՝ գիտնականները, ծրագրավորողները, երաժիշտները, կոմպոզիտորները, և քանի որ բոլորը խոսում են, որ գիտելիքահեն արդյունաբերություն և տնտեսություն ենք ստեղծում, ապա հեղինակային իրավունքի պաշտպանությունը շատ կարևոր է, և հուսով եմ, որ 2012 թ. այդ տեսակետից կլինի բեկումնային, և լուրջ փոփոխություններ կլինեն: 2006 թ. ՀՀ-ում համակարգչահենությունը տարեկան մոտ 1-2%-ով նվազել է, 2011 թ. համար սպասելիքները նույնն են, բայց դա բավարար չի, և հույս ունենք, որ այս տարին կլինի բեկումնային. և՛ պետական մարմինները, և՛ հեղինակները, և՛ ստեղծագործողները այդ խնդիրը բարձրացնում են և համատեղ ուժերով ավելի լավ արդյունք կգրանցենք»:
