Թուրքական Hürriyet թերթի փոխանցմամբ`Թուրքիայի խորհրդարանի հանձնաժողովը վերջակետ է դրել նախագահ Աբդուլլահ Գյուլի պաշտոնավարման ժամկետի շուրջ (5 կամ 7 տարի) առաջացած վեճերին։ Հանձնաժողովի նիստում, որը նախագահել է իշխող «Արդարություն և զարգացում» կուսակցությունը (ԱԶԿ) ներկայացնող Մուսթաֆա Շենթոփը, վճռվել է, որ Գյուլը պաշտոնավարելու է 7 տարի (մինչև 2014 թվականը)՝ առանց վերընտրվելու իրավունքի։
Նիստից հետո Շենթոփը լրագրողների հետ զրույցում հայտարարել է, որ իրենք այդ կապակցությամբ ժամանակավոր ուղղում են կատարել Սահմանադրությունում։ Դա անհրաժեշտ էր այն պատճառով, որ մինչև 2007 թվականի հանրաքվեն Թուրքիայի նախագահն ընտրվել է խորհրդարանի կողմից 7 տարի ժամկետով՝ առանց վերընտրման իրավունքի։
Հանրաքվեից հետո, որի արդյունքում ընդունվեցին սահմանադրական ուղղումները, Թուրքիայի նախագահն այսուհետ պետք է ընտրվի ժողովրդի կողմից 5 տարի ժամկետով՝ նույն ժամկետով վերընտրվելու հնարավորությամբ։ Շենթոփը եզրափակել է, որ Աբդուլլահ Գյուլը պետք է պաշտոնավարի մինչև 2014 թվականը (7 տարի)՝ առանց վերընտրման իրավունքի։
Հիշեցնենք, որ թուրքական խորհդարանում ներկայացված ընդդիմադիր կուսակցությունները՝ քեմալական ԺՀԿ-ն, ազգայնական ԱՇԿ-ն և քրդական ԽԺԿ-ն, պահանջում են, որ 2012 թվականին Թուրքիայում անցկացվեն նախագահական ընտրություններ, քանի որ 2007 թվականի սահմանդրական ուղղումներով նախագահի պաշտոնավարման ժամկետը 7 տարուց կրճատվել է 5 տարվա՝ նույն ժամկետով վերընտրվելու հնարավորությամբ։
