Ռուսական Regnum լրատվական գործակալության փոխանցմամբ՝ ԱՄՆ երկրաբանական ծառայության (USGS) առաջատար մասնագետ Թոմ Փարսոնսը և Վաշինգտոնի համալսարանի պրոֆեսոր Ջոն Վիդալը ուժգին երկրաշարժ են կանխատեսել Թուրքիայի տարածքում։
Նրանք չեն բացառում, որ Ստամբուլի շրջանում կարող է գրանցվել 7.5-7.7 մագնիտուդ ուժգնությամբ երկրաշարժ։ Թոմ Փարսոնսի խոսքերով՝ Ստամբուլում այդպիսի երկրաշարժի հավանականությունը կազմում է 40-60 տոկոս. «Թե ինչպիսին կլինեն Ստամբուլի համար այդ երկրաշարժի հետևանքները՝ կախված կլինի նրա շենքերի սեյսմակայունության և քաղաքային իշխանությունների նախապատրաստվածության աստիճանից»։
Ջոն Վիդալն իր հերթին հայտարարել է, որ ԱՄՆ սեյսմիկ սարքավորումն աշխարհում ամենաժամանակակիցն է, այն կարող է ֆիքսել աշխարհի յուրաքանչյուր կետում երկրի ընդերքի սեյսմիկ ակտիվությունը. «Մեր դիտարկումները ցույց են տվել, որ Թուրքիայում և մասնավորապես Էգեյան ծովի շրջանում նկատվում է սեյսմիկ ակտիվություն։ Հետևաբար երկրաշարժի ռիսկի մեծ հավանականություն գոյություն ունի նաև Իզմիրում»։
Հիշեցնենք, որ նախորդ տարվա նոյեմբերին իր աշխատանքներն է սկսել Ստամբուլի բոլոր շենքերի սեյսմակայունությունը ստուգող հատուկ հանձնաժողովը, որը պետք է պարզի, թե երկրաշարժի դեպքում որ շենքերը կարող են փլուզվել։ Հանձնաժողովի անդամները, ըստ առաջնահերթության, զննումներ կանցկացնեն Ստամբուլի տարբեր շրջաններում, քանի որ անհնար կլինի միաժամանակ 1.6 միլիոն շենքի զննումը։
Բացի այդ, մոտ ժամանակներս Ստամբուլում պետք է փլուզման ենթարկվի 50-60,000 շինություն, իսկ Ստամբուլի բնակիչների համար անցկացվելու են տարբեր տիպի դասընթացներ, որոնց շնորհիվ նրանք կսովորեն, թե ինչպես վարվել երկրաշարժի ժամանակ ու դրանից հետո։
Ի դեպ, 1999 թվականի օգոստոսի 17-ին Մարմարա ծովի շրջանում գրանցվել էր Թուրքիայի ամենաավերիչ երկրաշարժերից մեկը, որի ուժգնությունը կազմել էր 7.4 մագնիտուդ։ Երկրաշարժի արդյունքում, պաշտոնական տվյալներով, զոհվել էր մոտ 18,000 մարդ, երկրաշարժի տված վնասը կազմել էր 8.5 միլիարդ դոլար։
