Քրդական Fırat լրատվական գործակալությունը, վկայակոչելով TRT Haber-ը, հայտնում է, որ Ստամբուլի Սիլիվրի շրջանի դատախազությունը դիմել է Թուրքիայի խորհրդարանին՝ թուրքական ընդդիմության առաջնորդ, «Ժողովրդա-հանրապետական» կուսակցության (ԺՀԿ) ղեկավար Քեմալ Քըլըչդարօղլուին պատգամավորական անձեռնմխելիությունից զրկելու համար։
Սիլիվրիի դատախազությունը պատրաստ է «Էրգենեկոն» ահաբեկչական կազմակերպության գործի շրջանակներում քրեական գործ սկսել Քըլըչդարօղլուի նկատմամբ։ Եթե Թուրքիայի խորհրդարանն ընդառաջի Սիլիվրիի դատախազությանը, ապա Քըլըչդարօղլուի նկատմամբ կհարուցվի քրեական գործ։
Նշվում է, որ նախորդ տարվա նոյեմբերի 10-ին Քըլըչդարօղլուն այցելել է Սիլիվրիի բանտ (ուր ներկայումս հայտնվել է 2008-2010 թվականներին Թուրքիայի Գլխավոր շտաբի պետ Իլքեր Բաշբուղը.- 1in.am) և հանդիպել «Էրգենեկոն»-ի գործով ձերբակալված ԺՀԿ-ական պատգամավորներ Մուսթաֆա Բալբայի և Մեհմեթ Հաբերալի հետ։
Հիշեցնենք, որ նախորդ տարվա հունիսի 12-ին Թուրքիայում կայացած խորհրդարանական ընտրություններից հետո, որի արդյունքներով ԺՀԿ-ն 550 հոգանոց խորհրդարանում ստացավ 135 մանդատ, ԺՀԿ-ն շարունակ հանդես էր գալիս խորհրդարանի աշխատանքները բոյկոտելով՝ պահանջելով բանտից ազատ արձակել Մուսթաֆա Բալբային և Մեհմեթ Հաբերալին, ինչը, սակայն, չհաջողվեց։
