Քաղաքական և ընտրական տեխնոլոգիաների փորձագետ Արմեն Բադալյանը դժվարանում է ասել՝ կարո՞ղ է ԲՀԿ-ին խորհրդարանական ընտրություններին առանձին մասնակցության դրդած լինի Հայաստանի երկրորդ նախագահ Ռոբերտ Քոչարյանը: Այս մասին նա ասաց «Առաջին լրատվական»-ի հետ զրույցում
«Սա ներքին ապարատային հարց է, որին ես չեմ կարող պատասխանել, ինչպես և չի կարող պատասխանել ոչ ոք: Նման բան միանշանակորեն հայտարարելը գուշակությունների և երևակայության ժանրից կլինի, քանի որ աջակցության կամ դրդման մասին հայտարարություն ոչ մի, ոչ էլ մյուս կողմից չի եղել»,- ասաց Արմեն Բադալյանը:
Հարցին՝ ինչպիսի՞ դերակատարություն կարող է ունենալ Ռոբերտ Քոչարյանը գարնանը կայանալիք խորհրդարանական ընտրություններից առաջ և հետո, նա պատասխանեց. «Ընտրություններից առաջ Քոչարյանը հրապարակային ոչ մի դերակատարություն էլ չի ունենա, քանի որ նա իրենից այլևս ուժ չի ներկայացնում: Անգամ Արևմուտքն ու Ռուսաստանն են հասկացել, որ Հայաստանի երկրորդ նախագահն այլևս տեղ չունի Հայաստանի ապագա քաղաքական տեսլականում: Դրանից ելնելով էլ՝ ենթադրում եմ, որ նրա ճանապարհը ինչպես մինչև ընտրությունները, այնպես էլ դրանցից հետո, վերջնականապես փակված է: Այլ բան է Քոչարյանի՝ ոչ հրապարակային դերակատարությունը, ապա նա իր կողմնակիցներն ունի ինչպես պետական կառավարման համակարգում, այնպես էլ ուժային կառույցներում»:
Նշենք, որ «Ազատություն» ռադիոկայանի խնդրանքով անդրադառնալով ՀՀԿ-ի եւ ԲՀԿ-ի՝ ընտրություններին միասնական ցուցակով հանդես գալու մասին հարցին՝ Սամվել Նիկոյանը նշել էր, որ առայժմ չի ցանկանում բացառել կամ հաստատել որևէ բան։ ԱԺ խոսնակն, այդուհանդերձ, հավելել էր․ «Բայց, կարծում եմ, որ առանձին ցուցակներով են գնալու։ Եվ այդ կապակցությամբ կուսակցությունների համապատասխան ղեկավար մարմինները և ղեկավարները կհայտարարեն»։
