Նորվեգիայի ոստիկանությունը երկու անգամ կրճատել է շվեդ վարորդի տուգանքը` հիմնվելով այն փաստի վրա, որ շվեդները վաստակում են ավելի քիչ, քան նորվեգացիենրը:
Ինչպես հայտնում է BBC-ն, 61-ամյա Ուլֆ Անդեր Անդերսոնը տուգանվել էր մարտին այն բանի համար, որ նրա բեռնատարի արգելակները սարքին չեն եղել:
Տուգանքի նախնական գումարը կազմում էր 8000 նորվեգական կրոնա (մոտ 1320 դոլար): Սակայն անցած ամիս նորվեգական ընկերությունում աշխատող շվեդ վարորդը նամակ է ստացել, որտեղ նրան հայտնել էին, որ տուգանքը նվազեցվել է իր ազգային պատկանելության համար:
Նամակում նշվում է, որ ոստիկանությունը ուշադրություն է դարձրել այն փաստի վրա, որ իրավախախտը շվեդ է, և իջեցրել է տուգանքի չափը` «հաշվի առնելով նրա եկամուտների չափը»:
Նորվեգական VG թերթին տված հարցազրույցի ժամանակ Անդերսոնը հայտարարել է, որ ինքն, իհարկե, զգացված է, սակայն այդ քայլը շատ տարօրինակ է համարում:
«Ընդհանուր առմամբ, ես ավելի շատ աշխատավարձ եմ ստանում, քան իմ նորվեգացի գործընկերները, քանի որ շվեդական կրոնան ավելի բարձր է, քան նորվեգականը, իսկ ես ապրում են Շվեդիայում: Նրանք կարող էին այս փաստը հաշվի չառնել»,- հայտարարել էր վարորդը:
