Նորվեգացի ահաբեկիչ Անդերս Բրեյվիկը, որի իրականացրած ահաբեկչությունների հետևանքով անցյալ տարվա հուլիսին զոհվեց 77 մարդ, վաղվանից կարող է տեսակցել հարազատների հետ: Բացի այդ, ինչպես հաղորդում է РИА Новости-ն, նրան կթույլատրվի ռադիո լսել, հեռուստացույց դիտել, թերթ կարդալ ու շփվել լրագրողների հետ:
«Իրա» բանտի կանոններով, որտեղ պահվում է Բրեյվիկը, բանտարկյալներն իրավունք ունեն հանդիպումներ ունենալ շաբաթական մեկ անգամ: Հանդիպումները տեղի կունենան ուժեղ հսկողության պայմաններում:
Բրեյվիկի փաստաբանները հայտնել են, որ իրենց պաշտպանյալի հետ տեսակցելու ցանկություն են հայտնել մեծ թվով մասնավոր անձինք և ԶԼՄ-ների ներկայացուցիչներ: Ինքը՝ Բրեյվիկը, հայտարարել է, որ պատրաստ է հարցազրույց տալ միայն մի պայմանով, որ այն կհրապարակվի առանց գրաքննության:
Նա նախապատվությունը տալիս է Մեծ Բրիտանիայի, Ֆրանսիայի և Գերմանիայի լրագրողներին, քանի որ այդ երկրներում, նրա կարծիքով, ապրում են առավել մեծ թվով «իր ցանցի մարդիկ», ինչպես նաև՝ պարզապես կողմնակիցներ:
Ընդ որում, նա հետաքրքրվում է ոչ միայն մեդիայով. Բրեյվիկը ցանկություն է հայտնել հարցազրույց տալ մշակութային-պահպանողական հայացքներ ունեցող բլոգերներին:
Ավելի վաղ Նորվեգական մամուլի ասոցիացիայի նախագահ Պեր Էդգար Քովքոլդը կոչ էր արել նորվեգացի լրագրողներին հարցազրույց չվերցնել Բրեյվիկից: «Պետք է բարոյապես կույր լինել՝ չհասկանալու համար, ինչպիսի հարված կարող է լինել այդպիսի հարցազրույցը ահաբեկչության զոհերի հարազատների համար»,- ասել է նա:
Հիշեցնենք, 2011 թ. հուլիսի 22-ին Անդերս Բրեյվիկի իրականացրած կրկնակի ահաբեկչության հետևանքով զոհվեց 77, վիրավորվեց 96 մարդ:
