Թուրքական Radikal թերթի փոխանցմամբ՝ Թուրքիայի Ազգային հետախուզական կազմակերպությունը (MIT) և Գլխավոր շտաբը միմյանց են մեղադրում նախորդ տարվա դեկտեմբերի 28-ին հարավ-արևելյան հատվածում ընկած Շըրնաք նահանգի Ուլուդերեի շրջանում 35 քուրդ քաղաքացիների սպանության համար։
Հիշեցնենք, որ այն ժամանակ թուրքական Taraf թերթը տեղեկատվություն տարածեց, թե անօդաչու թռչող սարքերից (MIT-ի աղբյուրից) ստացված հետախուզական տվյալները վկայել են, թե տվյալ հատվածում կենտրոնացել է «Քրդստանի աշխատավորական» կուսակցության (PKK) զինյալների խումբը, ինչից հետո թուրքական ռազմաօդային ուժերի F-16 կործանիչները հարված են հասցրել նրանց։ Դրանից հետո պարզվել էր, որ զոհվածները ոչ թե քուրդ զինյալներ էին, այլ մաքսանենգ ճանապարհով Իրաքից ջորիներով մազութ փոխադրող հասարակ քրդեր։
Երեկ MIT-ը հերքել է, թե նմանատիպ հետախուզական տվյալներ է հաղորդել Գլխավոր շտաբին։ MIT-ի մամլո ծառայությունը հայտարարել է, որ իրենք Ուլուդերեի միջադեպի կապակցությամբ բացարձակապես որևէ տեղեկություն չեն հաղորդել այդ խմբի և նրա անձնակազմի քանակի, դրա գտնվելու վայրի, տվյալ հատվածում կենտրոնանալու ժամկետի մասին։
Նշվում է, որ Ուլուդերեի միջադեպի քննարկման կապակցությամբ Թուրքիայի նախագահ Աբդուլլահ Գյուլը Չանքայա նախագահական նստավայրում երեկ առանձին հանդիպումներ է ունեցել վարչապետ Ռեջեփ Էրդողանի, Գլխավոր շտաբի պետ, բանակի գեներալ Նեջդեթ Օզելի ու MIT-ի ղեկավար Հաքան Ֆիդանի հետ։
Գյուլը նախ ժամը 11.00-ին ընդունել է Էրդողանին, ինչը տևել է 40 րոպե։ Ապա ժամը 14.30-ին Գյուլին 80 րոպեով հյուրընկալվել է Օզելը, որի հետ հանդիպումից անմիջապես անց Գյուլն ընդունել է նաև MIT-ի ղեկավար Հաքան Ֆիդանին։
