Այսօր առավոտյան Կոնդ թաղամասում ամանորյա տրամադրությունը վերափոխվեց սգի: Առավոտը թաղամասի բնակիչներին գուժեց իրենց հարևան 45-ամյա Մերուժան Մինասյանի սպանության լուրը:
Հունվարի 4-ի գիշերը թաղամասի երիտասարդ բնակիչներից մեկը` Հարություն Մկրտչյանը, դանակահարել էր Մերուժան Մինասյանին, որին ստացած ծանր վնասվածքներով տեղափոխեցին հիվանդանոց, որտեղ նա մահացավ:
Նշենք, որ հանցագործը այսօր բերման է ենթարկվել ոստիկանություն:
«Առաջին լրատվական»-ը սպանության մանրամասները և հանգամանքները պարզելու համար զրուցեց թաղամասի բնակիչների հետ: Մերուժան Մինասյանի հարևանուհիներից մեկը, որը չցանկացավ ներկայանալ, մեզ հետ զրույցում տեղեկացրեց, որ հունվարի 4-ի գիշերը Հարություն Մկրտչյանը վիճաբանել է Հարություն Թանապուրյանի հետ: Երկուսն էլ եղել են ալկոհոլի ազդեցության տակ: «Նրանց մոտով անցնելիս է եղել Մերուժանը` Ամանորին իր տուն այցելած հյուրի` Ալեքսան Սիմոնյանի հետ: Տեսնելով վիճաբանողներին` նա փորձել է նրանց հանդարտեցնել, սակայն արդյունքում նրան դանակահարել են»,- մանրամասնեց հարևանուհին` հավելելով, որ նրա մարդասիրությունը ողբերգական վերջաբան ունեցավ իր և իր ընտանիքի համար:
Ըստ հարևանուհու` ի սկզբանե տեղեկություն էր տարածվել, որ Հարությունը դանակի 18 հարված է հասցրել: Մի շարք հարևաններ կատարվածը ողբերգություն և բարբարոսություն որակեցին` զարմանալով, թե ինչպես կարելի է այդպես վարվել մարդու հետ, ով ընդամենը մոտեցել էր վիճաբանող երիտասարդներին հանգստացնելու և վիճաբանությունը դադարեցնելու նպատակով:
Նշենք, որ վիճաբանության արդյունքում դանակի հարված է ստացել նաև Մերուժան Մինասյանի ընկերը` Ալեքսան Սիմոնյանը:
Հարևանների փոխանցած տեղեկությունների համաձայն` Մերուժան Մինասյանը Կոնդ թաղամասում բնակվում էր ծնողների և եղբոր հետ: Ամիսներ առաջ մահացել էր Մերուժանի հայրը, և այս Նոր տարին առաջին տարին էր առանց հոր: Մ. Մինասյանի եղբայրը զինվորական օդաչու է, աշխատում է ՌԴ-ում:
