Այսօր երեկոյան Հայ Առաքելական եկեղեցին կսկսի տոնել Հիսուս Քրիստոսի ծննդյան օրը: Տոնի խորհրդի, պատարագների և նշանակության մասին «Առաջին լրատվական»-ը զրուցեց Սուրբ Սարգիս եկեղեցու քահանա` Տեր Կորյուն քահանա Մարտիրոսյանի հետ: Նա նշեց, որ Հիսուս Քրիստոսի ծննդյան օրը Հայ Առաքելական եկեղեցին նշում է հունվարի 6-ին:
«Այսօր երեկոյան կատարվում է ճրագալույցի Սուրբ Պատարագը: Ճրագալույց նշանակում է ճրագները վառել, լուցանել, որը կատարվում է Սուրբ Ծնունդից և Հարությունից առաջ, տարին երկու անգամ»,- մեկնաբանեց քահանան` հավելելով, որ Ճրագալույցի Սուրբ Պատարագը տեղի է ունենալու այսօր` ժամը 17.30-ին:
Ինչպես տեղեկացրեց Տեր Կորյուն քահանա Մարտիրոսյանը, վաղը 11.00-ին կլինի Սուրբ Ծննդյան պատարագը, իսկ հաջորդ օրը Մեռելոցն է, որի դեպքում կկատարվի Մեռելոցի Սուրբ Պատարագ: Ըստ քահանայի` ծննդյան տոները շարունակվում են ութ օր` մինչև հունվարի 13-ը, մարդիկ ութօրական Քրիստոսին բերում են տաճար անվանակոչության` անունը կնքելով Հիսուս, որը նշանակում է Փրկիչ: «Քրիստոսը ծնվում է ճիշտ 2012 տարի առաջ և 30 տարեկան հասակում սկսում է իր քարոզչությունը, որը գրված է չորս ավետարաններում:
Մենք նաև Քրիստոսից սովորում ենք, թե ինչպես պետք է ճիշտ ապրել: Այսօր երեկոյան ամենքս մեկ մոմ վառած պետք է մեր տուն տանենք, որպեսզի մանուկ Հիսուսը ներս մտնի մեր տները: Ամեն տարի մենք այս հիշատակն ենք կատարում, որպեսզի նորացնենք մեր մեջ մանուկ Քրիստոսին, որպեսզի նաև թարմացնենք մեր հիշողությունը, թե ինչպես պետք է ապրել: Քրիստոսն աշխարհ եկավ մեր բոլորի հոգու փրկության համար»,- մանրամասնեց Տեր Կորյուն քահանա Մարտիրոսյանը:
Մեկնաբանելով Մեռելոցի խորհուրդը` նա ասաց, որ տարվա ընթացքում կան հինգ տաղավար տոներ` Սուրբ Ծնունդ, Զատիկ, Վարդավառ, Վերափոխումն Աստվածածնի և Խաչվերաց: Նրա խոսքով, այս սուրբ օրերի հաջորդ օրը եկեղեցում նշված է որպես Մեռելոցի օր: «Եկեղեցում կատարվում է պատարագ, որից հետո մարդիկ գնում են գերեզմանոցներ իրենց ննջեցյալներին այցելության: Նպատակը հետևյալն է. տոնի օրը գալիս ենք եկեղեցի, որպեսզի փառաբանենք Քրիստոսի ծնունդը, հաջորդ օրը գնում ենք գերեզմանոց ոչ թե ողբալու, այլ ավետիսը մեր ննջեցյալներին հայտնելու համար»,- վերլուծեց քահանան:
Անդրադառնալով տոնական սեղաններին` Տեր Կորյուն քահանա Մարտիրոսյանն ասաց, որ վերջին շրջանում սխալմունք է կատարվում: «Մինչև 50-ական թթ. ժողովուրդը պաս էր պահում` պահոց կերակուրներով էր սնվում, իսկ մեծ ուրախությունը կատարվում էր այս օրը, երբ մարդիկ պահոց շրջանից դուրս էին գալիս չամիչով փլավով, ձկով, բանջարեղենով և այլն»,- նշեց քահանան` հավելելով, որ այսօր արդեն մարդիկ կերակուրներից հոգնած են, և դա ավանդույթին խանգարում է, բայց ոչ եկեղեցուն, քանի որ եկեղեցու սպասավորներն այդ ուրախությունն ապրում են:
Նա ասաց. «Այդ ուրախությունը մեր բոլորի հոգիների և սրտերի մեջ է: Կերակուրով ոչինչ չի որոշվում, բայց լավ կլինի, որ քիչ-քիչ կարողանանք ետ վարժվել. ամանորյա սեղանը նորից բերելով պահեցողության և մեծ ուրախությունն ապրենք Քրիստոսի ծննդից հետո»:
Այսօր երեկոյան Սուրբ Ծննդյան սեղանին պետք է լինի չամիչով փլավ, ձուկ, բանջարեղեն և գինի: