Եվրոպական մշակութային աշխարհն այսօր նշում է իտալացի աշխարհահռչակ գրող, սեմիոտիկայի մասնագետ Ումբերտո Էկոյի 80-ամյակը:
Ապենիններում անցկացվում են այս հոբելյանին նվիրված սեմինարներ, համաժողովներ, մի շարք հրատարակչական ակցիաներ: Ինչպես հայտնում է ИТАР-ТАСС գործակալությունը, միլանյան հայտնի «Կորիեր դելա սերա» թերթը նախաձեռնել է հեղինակի «Մեծ պատմություն» բազմահատոր գրքի հրատարակությունը` Ումբերտո Էկոյի խմբագրությամբ ու նախաբանով:
Այս օրերին կրպակներում հայտնվել է այդ շարքի 13-րդ հատորը` նվիրված Հին Հռոմի մշակույթին:
Հատկապես այսօր իտալացի գրականագետ Միքելե Կոգոն թողարկել է Էկոյի նոր աշխատանքի` «Ումբերտո Էկոյի ֆենոմենոլիգիան» վավերագրական էսսեի էլեկտրոնային տարբերակը:
Ումբերտո Էկոն ծնվել է Պյեմոնտում` Ալեսանդրիա քաղաքում, 1954 թ. ավարտել է Թուրինի համալսարանը` «Միջնադարյան գրականություն և փիլիսոփայություն» որակավորմամբ:
Ներկայում նա Բոլոնիայի համալսարանի պորֆեսոր է, մի շարք արտասահմանյան ակադեմիաների պատվավոր անդամ:
Էկոն աշխատել է հեռուստատեսությունում, եղել է «Էսպրեսո» շաբաթաթերթի հոդվածագիր, գեղագիտություն ու մշակույթի տեսություն է դասավանդել Միլանի և Ֆլորենցիայի համալսարաններում:
Էկոյին համաշխարհային հռչակ է բերել նրա «Վարդի անունը» (1980 թ.) փիլիսոփայական-դետեկտիվ վեպը, որի գործողությունները ծավալվում են միջնադարյան մենաստանում:
Ումբերտո Էկոն մեծաթիվ գրքերի ու հոդվածների հեղինակ է: 2010 թ. հոկտեմբերին Իտալիայում լույս տեսավ նրա «Փարիզյան գերեզմանոցը» վեպը: